Thursday, 9 November 2017

RUFAA YA MAFULUTO YATUPWA KOMBE LA SPANEST, MALIZANGA, ,MBOLIBOLI WAPENYA ROBO FAINALI


KAMATI ya mashindano ya Kombe la SPANEST Piga Vita Ujangili, Okoa Tembo imetupilia mbali malalamiko ya Mafuluto FC dhidi ya mchezo wake wa jana na Malizanga FC baada ya kutozingatia taratibu za uwasilishwaji wake.

Mafuluto na Malizanga walimenyanya katika mchezo huo wakitafuta kufuzu hatua ya robo fainali ya ligi hiyo itakayoanza kutimua vumbi Jumamosi.

Ilikuwa katika dakika ya 87 ya mchezo, Mafuluto waliokuwa wakiongoza kwa goli 1-0 waliposusa kuendelea na mchezo huo baada ya Malizanga FC kupata bao la kusawazisha.

Ili waweze kufuzu katika hatua hiyo ilikuwa ni lazima kwa Mafuluto FC kushinda mechi hiyo.

Afisa Habari wa Mashindano hayo, Rashid Msigwa amesema; “Mafuluto walilalamikia goli hilo, wakasusa kuendelea na mchezo, lakini wakashindwa kuwasilisha malalamiko yao kwa maandishi na hivyo malalamiko yao yaliyowasilishwa na waamuzi wa mchezo huo kwa mdomo yametupiliwa mbali.”

Rashid amesema pamoja na mchezo huo kuvunjika Dk 87, kamati imeamua matokeo yake yabaki kama ilivyo na hivyo kufanya timu hizo zigawane pointi hatua iliyoibeba Malizanga FC waliofikisha Pointi 6 katika kundi lao dhidi ya Mafuluto waliofikisha Pointi 5.

Kwa hatua hiyo Malizanga inaungana na Mboliboli FC iliyoichapa Mkumbwanyi FC kwa magoli 3-2 kufuzu katika hatua hiyo ya robo fainali.

Timu zingine zilizofuzu hatua Kinyika, Itunundu na Ilolompya kwa upande wa tarafa ya Idodi na Mapogolo, Mahuninga na Idodi kwa upande wa tarafa ya Pawaga.

Mratibu wa SPANEST, Godwell Ole Maing’ataki amesema; “baada ya kupata timu nane zilizofuzu hatua hii ya robo fainali, leo tutakuwa na shughuli ya kugawa vifaa kwa ajili ya timu hizo.”

Alitaja vifaa hivyo kuwa ni pamoja na jezi, mipira na vifaa vingine vitakavyoziwezesha timu hizo kushiriki hatua hiyo muhimu kuelekea kupata washindi watatu wa ligi hiyo.

Amesema ligi hiyo inayofanyika kwa mwaka wa nne sasa ilianzishwa na Spanest ambao ni Mradi wa Kuboresha Mtandano wa Maeneo Yaliyohifadhiwa Kusini mwa Tanzania ikilenga kuwahamasisha wananchi wa vijiji 24 vya tarafa hizo zinazopakana na hifadhi ya Taifa ya Ruaha kushiriki katika vita dhidi ya ujangili na kuokoa maisha ya Tembo.

“Wanachotakiwa kufanya wananchi hao ni kupiga namba ya simu ya bure 0800751212 na kufichua taarifa za kweli za ujangili, taarifa hizi huwa siri kwahiyo wananchi wasiogope kutoa taarifa hizo,” alisema.

Mshindi wa kwanza wa ligi hiyo itakayopigwa kwa mwezi mmoja ataondoka na kombe, medali za dhahabu, seti moja ya jezi, cheti, Sh Milioni Moja taslimu na atapata fursa ya kutembelea hifadhi ya taifa ya Ruaha.


Na mshindi wa pili ataondoka na medali za shaba, cheti, mipira miwili na Sh 700,000 taslimu, huku mshindi wa tatu akioondoka na cheti, medali na Sh 500,000.

Reactions:

0 comments:

Post a Comment