Thursday, 9 November 2017

CCM YAMSAFISHA MGOMBEA WAKE UDIWANI KATA YA KITWIRU





Chama cha Mapinduzi kimeendelea kuwaomba wananchi wa kata ya Kitwiru wamchague mgombea wake, Baraka Kimata kuwa diwani wa kata hiyo huku kikikanusha tuhuma mbalimbali zinazotolewa na wapinzani wao dhidi ya mgombea huyo na chama hicho.

Katika mkutano wake ulifanyika mtaa wa uyole, Diwani wa kata ya Mshindo, Ibrahim Ngwanda amewataka wapiga kura wa kata hiyo kuupuza madai ya wapinzani wao kwa mgombea wao ambaye awali alikuwa diwani wa kata hiyo kupitia Chadema, kwamba alinunuliwa kabla ya kuhamia CCM.

“Hatujanunua diwani yoyote wa Chadema na wala hatuna mpango wa kufanya hivyo. Iliyoko mdarakani ni serikali ya CCM, Ilani inayotekelezwa ni ya CCM na hata hao wapinzani wanatekeleza Ilani hiyo hiyo, kwanini tununue wapinzani wanaotekeleza pia Ilani yetu?” aliuliza.

Alisema kama biashara ya kununua wapinzani ingekuwa inabadili mfumo wa chama hicho na serikali yake katika kutekeleza majukumu yake, basi mtu wa kwanza kununuliwa mjini Iringa angekuwa Mbunge wa Jimbo la Iringa Mjini Mchungaji Peter Msigwa.

Akiomba kura kwa wapiga kura wa mtaa huo, Kimata alisema; “Nimeondoka Chadema kwasababu nadhani kuhudumia wananchi kunahitaji ushirikiano wa chama na viongozi waandamizi mbalimbali, mambo ambayo niliyakosa nikiwa katika chama hicho.”

Kwasababu ya kukosa ushirikiano toka kwa Mbunge Msigwa na Meya wa Manispaa ya Iringa, Alex Kimbe, aliona haiwezekani tena kuwatumikia na kuwaletea maendeleo wananchi wa kata hiyo kwa kupitia Chadema.

Anasema ameingia CCM kwasasababu ni chama ambacho kinajua wapi kinataka kuwapaleka watanzania na kina mfumo unaoeleweka kikatiba wa namna ya kushughulikia matatizo yake tofauti na Chadema ambako mambo yake mengi yanashughulikiwa kwa utashi wa mtu au kikundi cha watu.

‘Chadema ni kama gari iliyokosa matairi, haina injini, akina Mbowe na timu yake ukiwapelekea tatizo walishughulikie, ni watu wanaongalia nani anayelamikiwa na pale malalamiko yanapohusu watu wao wa jirani ni wazito kuchukua hatua zitakazoleta muafaka,” alisema.

Alisema amehoji mambo mengi yanayokwenda ndivyo sivyo ndani ya Chadema hatua iliyopelekea aondolewe katika nafasi yake ya katibu Mwenezi wa Chadema Jimbo la Iringa Mjini na hatua iliyokuwa ikifuata dhidi yake ilikuwa ni kufukuzwa uanachama.

“Unawezeje kuendelea kuwa katika chama kama hicho ambacho kauli ya mtu mmoja au wawili inageuka kuwa maamuzi ya vikao au  maamuzi ya chama?, kwahiyo nikaamua kuondoka kwa usalama wangu na wananchi wa kata yangu ya Kitwiru,” alisema.

Alimpongeza Rais Dk John Magufuli akisema anafanya mengi yanayolenga kumkomboa mtanzania na Taifa kwa ujumla hivyo anapaswa kuungwa mkono.


Akiwaomba kura, Kimata aliwataka wapiga kura wa kata hiyo wamachague kuwa diwani wao ili aendelee kuyasimamia yale aliyoyaanzisha na aweze kushughulikia kero zingine za wananchi wa kata hiyo kwa kutumia Ilani ya CCM inayoendelea kutekelezwa.

Reactions:

0 comments:

Post a Comment