Thursday, 26 May 2016

WILAYA YA IRINGA YAJIPANGA KUDHIBITI MAUAJI, UBAKAJI NA BODABODA


VITENDO vya ubakaji na mauji wilayani Iringa, vimeelezwa na mkuu wa wilaya hiyo, Richard Kasesela kuanza kuota mizizi inayohatarisha sifa ya amani na furaha iliyopo katika eneo hilo.

Pamoja na vitendo vya ubakaji na mauaji, Kasesela ameelezea changamoto za usafiri wa bodaboda katika wilaya yake kwamba umeongeza ajali, uvunjishu wa sheria za barabarani, ujambazi na mauaji.

Akizungumza na wanahabari jana, amelitaka jeshi la Polisi kuzidisha juhudi kwa kuhakikisha watuhumiwa wa matukio hayo wanakamatwa bila kujali wingi wao na kufikishwa katika vyombo vya dola.

“Tunajua mahabusu zetu ni ndogo, tutaomba kutumia ukumbi wa jumba la maendeleo la mjini Iringa kuwahifadhi matuhumiwa watakaokuwa wanakamatwa kutokana na matukio mbalimbali ya kihalifu tukilenga kuusafisha mji na wilaya yetu” alisema.

Akizungumzia matukio ya mauaji mkuu wa wilaya huyo ambaye ni Mwenyekiti wa Kamati ya Ulinzi na Usalama ya Wilaya ya Iringa alisema kwa taarifa za siku mbili zilizopita raia wawili wameuawa baada ya wananchi kujichukulia sheria mkononi, na wengine watatu wamefariki katika matukio ya ujambazi, wivu wa kimapenzi na ubakaji.

Akizungumzia tukio la ubakaji, Kasesela alisema wananchi wa eneo la Mtwivila mjini Iringa, walimshambulia mwananchi mmoja aliyefahamika kwa jina la Emanuel (30) kwa tuhuma za kubaka mtoto wa miaka 10 na kumpiga mawe hadi kufariki.

Kuhusu ubakaji alisema katika kipindi kifupi kilichopita kumeibuka wimbi la ubakaji wa watoto chini ya miaka 14 linalokabiliwa na tatizo la ukusanyaji wa ushahidi na uendeshaji wa kesi zake.

“Makundi manne yaani jeshi la Polisi, ofisi ya mwanasheria mkuu, mahakama na madaktari wanatupiana lawama katika kutekeleza wajibu wao wa kuwashughulikia wabakaji na kusababisha wahanga wa ubakaji waendelee kuteseka,” alisema.

Ili kusaidiana na kukabiliana na vitendo hivyo aliwataka wazazi kusaidia jukumu la kuwalinda watoto na kuwatunza

Akizungumzia changamoto ya bodaboda mjini hapa alisema uanzishwaji wake ulikuwa wa nia njema ukilenga kupunguza changamoto ya ajira nchini.

“Mbali na ajali zinazosababishwa na bodaboda kutokana na uvunjishu wa sheria za barabarani, zimekuwa  zikutumika katika matukio ya wizi na uporaji na kusababisha baadhi yao kuuawa,” alisema.


Ili kukomesha matukio ya kiharifu yanayosababishwa na bodaboda, mbinu mbadala ya kuwabadilisha madereva wake fikra ili watii sheria na kuwa na muda maalumu wa kufanya biashara hiyo, inatafutwa na watatakiwa kutambuliwa katika vituo vyao kwa kuwa na daftari lenye picha zao.

Reactions:

0 comments:

Post a Comment