Wednesday, 25 May 2016

Majaliwa: Tanzania kuiuzia umeme Zambia

WAZIRI Mkuu, Kassim Majaliwa amesema Tanzania ina mpango wa kujenga njia ya umeme kutoka Mbeya hadi Zambia kupitia Tunduma ili kupunguza tatizo la umeme linaloikabili nchi hiyo.
“Serikali ya Tanzania inajenga njia ya umeme ya msongo wa KV 400 kutoka Iringa - Dodoma – Singida – Shinyanga ambayo ni sehemu ya mradi mkubwa wa umeme unaolenga kuunganisha Zambia, Tanzania na Kenya,” alisema.
Alisema upembuzi yakinifu kwa ajili ya KV400 kutoka Iringa hadi Mbeya, umekamilika tangu mwaka 2012, na hivi sasa Serikali inatafuta fedha kwa ajili ya kuunganisha kipande cha kutoka Mbeya na gridi ya Taifa ya Zambia.
Waziri Mkuu ambaye anahudhuria katika Mkutano wa Benki ya Maendeleo ya Afrika (AfDB) kwenye Kituo cha Mikutano cha Mulungushi kilichopo Lusaka, Zambia kwa niaba ya Rais John Magufuli, alitoa ufafanuzi huo jana mchana wakati akichangia hoja kwenye mjadala wa wakuu wa nchi na Serikali uliohusu Nishati na Mabadiliko ya Tabianchi kwenye ukumbi wa mikutano cha kimataifa wa Mulungushi.
Alisema ili kukabiliana na changamoto ya nishati barani Afrika, nchi za bara hili zinahitaji kuwa na fedha ama mitaji, teknolojia ya kisasa na wataalamu wenye ujuzi wa kutosha, jambo ambalo amesema ni gumu kulikamilisha kila nchi peke yake.
Alisema ili kukaribisha wawekezaji kwenye sekta ya umeme, Tanzania inafanyia marekebisho sheria zake ili kuruhusu uwekezaji kwenye sekta hiyo.
Akizungumzia kuhusu hali ya nishati nchini Tanzania, Waziri Mkuu alisema Tanzania imebarikiwa kuwa na gesi asilia yenye ujazo wa futi trilioni 57.25 (tcf), makaa ya mawe yenye ujazo wa tani bilioni 1.9 (asilimia 25 imevumbuliwa), umeme wa nguvu ya maji wa gigawati 4.7 ambazo ni asilimia 12 tu ndiyo inatumika.

Reactions:

0 comments:

Post a Comment