Friday, 27 May 2016

CHUMI AKATAA KUMSAMEHE WILLIAM MUNGAI


MBUNGE wa Jimbo la Mafinga Mjini, Cosato Chumi amekataa kumsamehe aliyekuwa mgombea wa jimbo hilo kupitia Chama cha Demokrasia na Maendeleo (Chadema), William Mungai anayedaiwa kuwatumia baadhi ya wanasiasa kuomba asamehewe kulipa gharama za kesi ya uchaguzi.

Mungai ambaye ni mmoja wa watoto wa Joseph Mungai ambaye kwa zaidi ya miaka 20 alikuwa mbunge wa jimbo la Mufindi Kaskazini na waziri katika serikali ya awamu ya kwanza hadi ya nne alifungua kesi kupinga matokeo yaliyompa ushindi Chumi baada ya kushindwa uchaguzi huo wa 2015.

Kesi hiyo namba 8 ya mwaka 2015 ilitupiliwa mbali na Mahakama Kuu Kanda ya Iringa Mei 3, mwaka huu baada ya kukosekana kwa ushahidi wa kutosha kutengua matokeo hayo.

Akizungumza na wapiga kura wa jimbo lake kwenye mkutano wa hadhara uliofanyika hivikaribuni katika uwanja wa Mashuja mjini Mafinga, Chumi alisema; “mimi ni mtoto wa masikini siwezi kuwasaliti wananchi wanyonge, mmeniamini na kunichagua kuwa mbunge wenu, niwaahidi sitawaangusha.”

“Niwashukuru tumekuwa pamoja katika kipindi hicho kigumu cha kesi baada ya wenzetu kwenda mahakamani kupinga matokeo ya ubunge ulionipa ushindi, lakini Mungu alikuwa nasi na tukashinda kesi hiyo baada ya ukweli kubainika,” alisema.

Alisema wakati kesi hiyo ikiendelea, wananchi wa Mafinga waliwekwa roho juu na baadhi ya wanasiasa waliokuwa wakiombea ashindwe kesi hiyo ili uchaguzi urudiwe.

Alisema baada ya kushindwa kesi hiyo, wameanza kutuma watu wakisema wao wote ni vijana kwahiyo wasameheane jambo ambalo hayuko tayari kulifanya.

“Leo mawakili wangu wameanza kuandaa mchanganuo wa gharama za kesi. Ni lazima watulipe maana katika hili tumepoteza muda na rasilimali nyingi. Kuna watu walitaka kutusaidia lakini walisitisha misaada yao baada ya kesi hiyo kufunguliwa,” alisema.


“Kwa kweli mimi ni mkristo kweli kweli lakini katika hili hata Mungu hawezi kulibariki. Kwahiyo niseme siwezi kusamehe kwasababu kesi hiyo imeturudisha nyuma kwenye mambo mengi sana,” alisema.

Reactions:

0 comments:

Post a Comment