Sunday, 20 March 2016

SHAMRASHAMRA YA WIKI YA MAJI IRINGA, IRUWASA YAWAPA SOMO WANAFUNZI








WAKATI asilimia 96 ya wakazi wa mjini Iringa wakipata huduma ya maji safi na salama, Mamlaka ya Majisafi na Usafi wa Mazingira Iringa Mjini (IRUWASA) imesema zaidi ya asilimia 30 ya maji wanayosambaza yanapotea kwasababu mbalimbali ikiwemo wizi.

Mhandisi wa mamlaka hiyo, Jane Malongo alitaja sababu zingine zinazopoteza maji hayo na hatimaye mapato ya mamlaka hiyo kuwa ni pamoja na mivujo katika mtandao wake na kuziba kwa mita zinazotumika kusoma matumizi halali ya maji.

Mhandisi Malango alitoa taarifa hiyo juzi wakati mamlaka hiyo ikitoa semina kwa wawakilishi wa wanafunzi wa shule za sekondari za mjini Iringa ya namna shughuli ya uzalishaji maji inayovyofanyika ikiwa ni sehemu ya maadhimisho ya wiki ya maji ambayo kilele chake ni Machi 22.

Katika semina hiyo iliyofanyika katika moja ya kumbi za mamlaka hiyo, wanafunzi hao walielezwa taratibu za maunganisho ya maji na walifundishwa jinsi vyanzo vya maji vinavyotunzwa.

Mengine waliyojifunza wanafunzi hao ambao pia walipata fursa ya kutembelea chanzo cha maji na sehemu ya kutibu majisafi na majitaka ni pamoja na namna ya kutoa taarifa ya mivujo na ukosekanaji wa maji, matumizi mazuri ya mtandao wa majitaka na dira na tozo za maji.

Mhandisi Malongo alisema IRUWASA inayokusanya zaidi ya Sh Milioni 318 kwa mwezi, ina wateja zaidi ya 1,700 wakiwemo wateja 73 wa kibiashara na taasisi 39.

Katika matembezi yao katika chanzo cha maji na sehemu ya kutibu majisafi na majitaka mtaalamu wa uzalishaji maji wa mamlaka hiyo, Paulo Mboka aliwaeleza wanafunzi hao hatua zote muhimu zinazotumiwa na mamlaka hiyo hadi kusambaza maji safi na salama kwa wateja wake.

Mboka alisema jumla ya mita za ujazo 24,000 za maji zinaweza kuzalishwa na mamlaka hiyo kila siku wakati mahitaji halisi kwa wakazi wa Iringa Mjini ni wastani wa mita za ujazo 16,000 kwa siku.

 Alisema IRUWASA inaendelea kuusimamia mtandao wa usambazaji majisafi kwa kuhakikisha inafuatilia na kuziba mivufo yote na kubadilisha mabomba yalichoka wakati ikiendelea kupanua huduma zake kwenye maeneo ambayo hayana mtandao.

Wakati huo huo IRUWASA imesema gharama za maji kwa wateja wake zinaonekana kuwa juu kwasababu ya kufidia gharama kubwa ya uzalishaji inayosababishwa gharama na matumizi makubwa ya umeme.


Reactions:

0 comments:

Post a Comment