Monday, 21 May 2018

MWENGE WA UHURU KUHIMIZA MAPAMBANO YA UKIMWI IRINGA


MKOA wa Iringa umejipanga kikamilifu kutumia mbio za Mwenge Uhuru kuhimiza mapambano dhidi ya Maambukizi ya Virusi vya Ukimwi (VVU).

Hatua hiyo inajibu ombi la Rais Dk John Magufuli ambaye hivi karibuni aliutaka mkoa huo kuongeza mapambano dhidi ya maambukizi hayo kwa kigezo kwamba takwimu zake zinaongezeka wakati za kitaifa zinashuka.

Matokeo yanayotokana na utafiti wa viashiria na matokeo ya Ukimwi Tanzania (THIS) ya mwaka 2016/2017 yanaonesha maambukizi katika mkoa wa Njombe unaoongoza kitaifa yamepungua kutoka asilimia 14.8 mwaka 2011/2012 hadi asilimia 11.4 na mkoa wa Iringa ambao ni pili yameongezeka kutoka asilimia 9.1 hadi asilimia 11.3.

Akizungumza na wahabari leo wakati akitoa taarifa ya ujio wa mwenge mkoani hapa, Mkuu wa Mkoa wa Iringa Amina Masenza alisema mapmbano dhidi ya maambukizi hayo yanakwenda na kauli mbiu isemayo “mwananchi jitambue, pima afya yako sasa.”

Masenza alisema pamoja na kampeni hiyo, mwenge huo utatoa ujumbe maalumu wa mapambano dhidi ya maralia, dawa za kulevya na rushwa, na utatilia mkazo umuhimu wa uwekezaji katika elimu unaofanywa na serikali kwa kushirikiana na wananchi na wadau wengine wa maendeleo.

Alitaja shughuli zingine zitakazofanywa na mbio hizo za mwenge kuwa ni pamoja na kukagua miradi 40 ya maendeleo  yenye thamani ya zaidi ya Sh Bilioni 24.4 katika sekta ya elimu, afya, maji, maliasilia, kilimo, viwanda na uvuvi.

Alisema mkoa wa Iringa utaanza mbio za Mwenge Mei 23 hadi Mei 27 baada ya kuupokea kutoka mkoa wa Mbeya na ukiwa mkoani humo utapita katika halmashauri zote tano kutoa ujumbe huo na kuhimiza maendeleo.

Alisema Mwenge huo utaanza kukimbizwa katika halmashauri ya Mufindi, Mei 23 na Mei 24 utaelekea halmashauri ya wilaya ya Iringa, Mei25 utakuwa halmashauri ya wilaya ya Kilolo, Mei 26 halmashauri ya manispaa ya Iringa na Mei 27 utakimbizwa katika halmashauri ya Mji Mafinga.

Baada ya kukimbizwa katika mkoa wa Iringa, alisema Mwenge huo utakabidhiwa kwa mkoa wa Njombe

Wednesday, 16 May 2018

NAPE, BASHE WAOMBA WABUNGE WAIKATAE BAJETI YA KILIMO


Image result for bashe bungeni


WAKATI Mbunge wa Mtama (CCM), Nape Nnauye ameitaka Serikali kutoona aibu kuiondoa bungeni bajeti ya Wizara ya Wizara ya Kilimo ili ikajipange upya kwa maelezo kuwa bajeti hiyo itaiumiza Serikali ya Awamu ya Tano, Mbunge wa Nzega Mjini (CCM), Hussein Bashe amewataka wabunge wenzake kuungana na kuikataa bajeti ya Wizara ya Kilimo ya mwaka 2018/19 ili kuipa nafasi Serikali kuwasilisha bungeni bajeti itakayogusa maisha ya Watanzania.

Nape  na Bashe wametoa kauli hizo leo Jumatano Mei 16, 2018 wakati wakizungumza katika mjadala wa bajeti hiyo bungeni mjini Dodoma.

Waziri huyo wa zamani wa habari amesema umefika wakati wa kueleza ukweli kuwa bajeti ya wizara hiyo ni ngumu na haiendani kabisa la Ilani ya uchaguzi ya CCM, ikipitishwa itakuwa mwiba kwa Serikali.

Bashe amewaomba wabunge watumie kanuni ya 69 ya Bunge kuirudisha Wizara ya Kilimo na Wizara ya Fedha zikaketi ili kuja na bajeti inayogusa maisha ya watu.

Amesema haiwezekani sekta inayogusa asilimia 70 ya Watanzania na kuchangia asilimia 30 katika pato la Taifa ikatengewa asilimia 0.8 ya fedha za maendeleo katika bajeti kuu ya Serikali.

“Sekta hii imeendelea kuonewa kwa muda mrefu na siyo sahihi, hasa wabunge wa CCM tuna wajibu wa kumlinda mkulima,” amesema Bashe.

Naye Nape amesema Bajeti hii inagusa maisha ya watu hivyo ujumbe unaotakiwa kwa wananchi ni je, Serikali inajali maendeleo ya vitu au watu waliowaweka madarakani jambo ambalo majibu yake yatakuwa na maana tofauti kwa wananchi.”

Amesema anamuonea huruma Waziri wa Kilimo, Dk Charles Tizeba kwa maelezo kuwa kuna mambo yaliyo nje ya uwezo wake, lakini kila jambo anabebeshwa yeye. “Ni mtihani mkubwa kwa Serikali katika bajeti ambayo inagusa asimilia 80 ya Watanzania.

“Wakati fulani tulisema Serikali ikwepe kuwekeza fedha nyingi kwenye miradi mikubwa inayoweza kujiendesha kibiashara, lakini tukashambuliwa kama si wazalendo katika nchi hii, na hili Tizeba tutakubebesha bure lakini si lako,” amesema Nape.

Amesema akikubali bajeti hiyo, wananchi wake wa Mtama na wakulima wa korosho, ufuta, pamba na mazao mengine nchini watamshangaa kwa kiasi kikubwa hivyo hakuna shida wala aibu kukaa pamoja na kuifumua kama ilivyowahi kufanyika kwa wizara nyingine.

HAKIMU ANAYESIKILIZA KESI YA ABDUL NONDO AGOMA KUJITOA



HAKIMU Mkazi wa Mahakama ya Hakimu Mkazi Iringa, John Mpitanjia leo amegoma kujitoa kusikiliza kesi inayomkabili Mwenyekiti wa Mtandao wa Wanafunzi (TSNP) Abdul Nondo anayeshitakiwa mahakamni hapo kwa makosa mawili.

Nondo ameshitakiwa kwa kuchapisha taarifa za uongo kwamba yupo hatarini na kuzisambaza mtandaoni na kutoa taarifa za uongo kwa askari Polisi Koplo Salim wa Kituo cha Polisi Mafinga wilayani Mufindi kuwa alitekwa na watu wasiojulikana Dar es Salaam na kupelekwa kiwanda cha Pareto Mafinga.

Katika kesi hiyo ya jinai namba 13 ya mwaka 2018 ilidaiwa kwamba Machi 7, mwaka huu akiwa Ubungo jijini Dar es Salaam, mshitakiwa alitenda kosa la kuchapisha taarifa hizo akitumia simu ya kiganjani yenye No. 0659366125 kinyume cha Sheria ya Makosa ya Mtandao na kusambaza katika mitandao ya kijamii.

Juzi, mshatakiwa huyo aliandika barua ya kumkataa hakimu huyo kwa kile alichosema amekuwa na mawasiliano na baadhi ya mashahidi wa upande wa Jamuhuri jambo linalomkosesha imani ya kutendewa haki.

Akitoa uamuzi huo mdogo jana, Hakimu Mpitanjia alisema kuwa  sababu alizotoa mshtakiwa hazina msingi wowote na ataendelea kusikiliza shauri hilo ili pande zinazohusika zisichelewe kupata haki.

“Sababu walizotoa upande wa utetezi ni za kufikirika ambazo hazina ushahidi wowote na kwa kuwa mahakama ni chombo cha mwisho katika kutenda haki na kuwahisha haki, nitaendelea kusikiliza shauri hili kwa mujibu wa sheria,” alisema.

Akizungumzia uamuzi huo wa mahakama, Wakili wa Nondo, Jebra Kambole alisema upande wa utetezi umepokea uamuzi huo wa mahakama na hauna haja ya kuupinga  na sasa wamejielekeza kutumia njia nyingine za kisheria kupata haki yao.

“Kwa sasa tunaona shauri hili liendelee tu tutapambana mahakamani ili mteja wetu aweze kupata haki yake,” alisema.

Kesi hiyo imeahirishwa hadi Mei 18 ambapo upande wa Jamuhuri unategemea kulita mashahidi wake wawili watakaotoa ushahidi dhidi ya shauri hilo.

DC AWAPA SIKU 7 WADAIWA SUGU WA SIDO IRINGA KUFANYA MAREJESHO






MKUU wa Wilaya ya Iringa, Richard Kasesela leo ametoa siku saba kwa wadaiwa sugu 891 wanaodaiwa zaidi ya Sh Milioni 293 na Shirika la Kuhudumia Viwanda Vidogo (SIDO) Mkoa wa Iringa kulipa mikopo yao.

Akizungumza na wanahabari jana mbele ya maafisa wa shirika hilo, alisema baada ya siku saba kwisha, serikali itachukua hatua stahiki ikiwa ni kupita nyumba kwa nyumba kwa kila mkopaji na wadhamini wao na kuchukua hatua stahiki.

Kasesela alisema ofisi yake imeamua kushirikiana na SIDO kudai mikopo hiyo kwa kuzingatia kwamba shirika hilo ni la umma lisilotakiwa kukwamisha ili fursa ifike kwa watu wengine zaidi.

“Baada ya kupokea taarifa kutoka kwa Meneja wa SIDO Mkoa wa Ireinga, serikali imebaini kuwepo kwa wadaiwa sugu wa mikopo waliolimbikiza fedha nyingi jambo linalowanyima fursa wajasiriamali wengine kukopa,” alisema.

Alisema SIDO inategemewa sana kusukuma uanzishwaji na uendelezaji wa viwanda vidogo kupitia huduma hii ya utoaji wa mikopo ili kuwanufaisha watanzania  kwahiyo haistahili kuwavumilia watu wanaoikwamisha.

“Nawaagiza wakopaji wote popote walipo mkoani Iringa au wamehama mkoa wajue kuwa kumbukumbu za madeni yao zipo, picha zao zipo, majina yao yapo na wadhamini wao wapo, hivyo wanatakiwa kulipa mikopo hiyo” alisema.

Meneja wa SIDO mkoa wa Iringa Francisca Simoni alisema SIDO pamoja na huduma zingine zinazotolewa inatoa ushauri wa fedha na mikopo inayolenga kukuza biashara na viwanda vidogo vinavyoanzishwa au vilivyoanzishwa tayari lakini vinahitaji mikopo ili kukua.

Alisema kati ya wadaiwa hao 293, wadaiwa 167 ni binafsi wanaodaiwa jumla ya Sh 181, 396,500 na vikundi 15 vyenye wanachama 721 vinavyodaiwa jumla ya Sh 111,984,425.

Simoni alisema sehemu kubwa ya wadaiwa hao wapo mjini Iringa wakidaiwa jumla ya  Sh 269,331, 225 na kiasi kinachobaki kinadaiwa katika wilaya zingine za mkoa wa Iringa zikiwemo Sh 4,858,700 zinazodaiwa Iringa Vijijini.

Awali Afisa Mikopo wa SIDO, Neserian Laizer alisema malimbikizo hayo ya kati ya mwaka 2014 hadi sasa yamelizuia shirika kuendelea kutoa huduma hiyo ya mikopo hiyo ambayo ni kati ya Sh 100,000 na Sh 500,000 kwa mkopaji mmoja.

Naye Afisa Biashara wa SIDO, Niko Mahinya alisema SIDO imeamua kuunganisha nguvu na serikali kudai mikopo hiyo baada ya juhudi zake kukwamishwa na taasisi zingine wakiwemo madalali waliopewa kazi hiyo.

Monday, 14 May 2018

ABDUL NONDO AMKATAA HAKIMU ANAYESIKILIZA KESI YAKE




MWENYEKITI wa Mtandao wa Wanafunzi (TSNP) Abdul Nondo anayeshitakiwa katika mahakama ya hakimu mkazi Iringa ameandika barua ya kumkataa hakimu mkazi wa mahakama hiyo John Mpitanjia kuendelea kusikiliza kesi yake akisema ana viashiria vya kutomtendea haki.

Nondo ameshitakiwa kwa makosa mawili ya kuchapisha taarifa za uongo kwamba yupo hatarini na kuzisambaza mtandaoni na kutoa taarifa za uongo kwa askari Polisi Koplo Salim wa Kituo cha Polisi Mafinga wilayani Mufindi kuwa alitekwa na watu wasiojulikana Dar es Salaam na kupelekwa kiwanda cha Pareto Mafinga.

Katika kesi hiyo ya jinai namba 13 ya mwaka 2018 ilidaiwa kwamba Machi 7, mwaka huu akiwa Ubungo jijini Dar es Salaam, mshitakiwa alitenda kosa la kuchapisha taarifa hizo akitumia simu ya kiganjani yenye No. 0659366125 kinyume cha Sheria ya Makosa ya Mtandao na kusambaza katika mitandao ya kijamii.

Hakimu Mpitanjia leo alilazimika kuahirisha kuendelea kusikiliza ushahidi uliokuwa utolewa na mashahidi wawili wa upande wa mashitaka ili kupata msimamo wa mawakili wa pande zote mbili, Jamuhuri na utetezi juu ya sababu zilizotolewa na Nondo zikimtaka ajiondoe kusikiliza kesi hiyo.

Wakili wa utetezi, Jebra Kambole alisema anakubaliana na sababu tano zilizotolewa na mteja wake akiomba hakimu huyo ajitoe kusikiliza kesi hiyo ili mahakama hiyo iweze kutenda haki kwa pande zote mbili.

Moja ya sababu zilizoelezwa mahakamani hapo ni  pamoja na ujirani na mawasiliano anayodaiwa kuwa nayo hakimu huyo na Shahidi wa Jamuhuri, Kamanda wa Upelelezi wa Mkoa wa Iringa, RCO Kasindo kila kesi hiyo inapofikishwa mahakamani hapo.

Ukitoa mfano, upande huo wa utetezi ulisema mahakamani hapo kwamba April 15, 2018 hakimu huyo alionekana akiondoka katika eneo la mahakama hiyo akiwa na RCO huyo kwa kutumia gari la kiongozi huyo wa Polisi ambaye ofisi yake ndiyo iliyofanya uchunguzi wa kesi yake jambo linalompa hofu ya haki kutendeka.

Ukipinga hakimu huyo kujitoa upande wa Jamuhuri ukiongozwa na wakili Abel Mwandalama anayesaidiwa na Alex Mwita ulikiri kupokea nakala ya barua ya malalamiko ya Nondo lakini ukapinga sababu zilizotolewa kwa madai kwamba zinakosa msingi kwasababu zimetolewa bila ushahidi wowote.

“Hakuna ushahidi wowote katika sababu zake hizo za malalamiko zinazoweza kuifanya mahakama au wewe mwenyewe ujiondoe kusikiliza kesi hii, ni malalamiko dhaifu yasio na ushahidi” alisema.

Baada ya kusikiliza maoni ya pande hizo mbili, Hakimu Mpitanjia aliahirisha shauri hilo mpaka keshokutwa Mei 16 atakapotoa uamuzi mdogo kama aendelee au asiendelee kusikiliza kesi hiyo.

Akizungumza na wanahabari mara baada ya maamuzi hayo, Mratibu wa Kitaifa wa Mtandao wa Kutetea Haki za Binadamu Tanzania (THRD), Onesmo Ole Ngurumo alisema ni haki ya mtuhumiwa kumkataa hakimu baada ya kujiridhisha kwamba mwenendo wake unaweza kusababisha haki isitendeke kwa pande zote.

“Kama watetezi wa haki za binadamu, ombi letu tunaomba mahakama impe hakimu anayeweza kuwa katikati katika maamuzi. Awe kama mwamuzi wa mpira asiegemee upande fulani,” alisema.

MSANII LULU APUNGUZIWA ADHABU

Image result for lulu msanii magereza


Mcheza filamu, Elizabeth Michael maarufu Lulu amebadilishwa kifungo na sasa atatumikia adhabu hiyo akiwa nje yaani ‘kifungo cha nje’.

Lulu alihukumiwa kifungo cha miaka miwili jela Novemba mwaka jana baada ya kupatikana na hatia ya kumuua bila kukusudia msanii mwenzake, Steven Kanumba.

Akizungumza leo Jumatatu Mei 14, 2018, Ofisa Habari wa Jeshi la Magereza, Lucas Mboje amesema Lulu amebadilishiwa adhabu na atatumikia kifungo cha nje kwa amri ya Mahakama Kuu ya Tanzania, Dar es Salaam.

“Lulu amebadilishiwa adhabu na ameachiwa juzi Jumamosi kati ya saa 2 hadi 3 asubuhi. Hii si kwamba ameachiwa huru, bali amebadilishiwa adhabu na atatumikia kifungo chake nje, kitaalamu tunaita ‘community service’” amesema Mboje

Tuesday, 8 May 2018

MHANDISI MSHANA AKAMATWA KASHFA YA UJENZI CHUO KIKUU MKWAWA



JESHI la Polisi mkoa wa Iringa limemkamata Mkurugenzi Mtendaji wa kampuni ya MNM Engineering Service Ltd, Mhandisi Godwin Mshana kwa tuhuma ya kujenga chini ya kiwango, ukumbi wa mikutano wa Chuo Kikuu cha Mkwawa (MUCE) cha mjini Iringa.

Kukamatwa kwa Mhandisi Mshana ni utekelezaji wa agizo lililotolewa hivikaribuni chuoni hapo na Rais Dk John Magufuli la kufuatilia madai ya kuwepo kwa ubadhilifu wa fedha katika ujenzi wa ukumbi huo liogharimu Sh Bilioni 8.

Akizungumza na wanahabari jana jioni, Kamanda wa Polisi wa Mkoa wa Iringa, Juma Bwire alisema Mhandisi Mshana ambaye ni mkandarasi maarufu wa mjini Iringa alikamatwa akiwa nyumbani kwake Mei 3 ikiwa ni siku moja baada ya Rais kutoa agizo hilo.

“Baada ya kumkamata mkandarasi huyo tumeunda kikosi kazi kinachojumuisha Takukuru  ili kwa pamoja tufanye uchunguzi wa kina wa tukio hili,” alisema bila kuzungumzia hatma ya dhamana ya mtuhumiwa huyo kwasasa.

Kamanda wa Takukuru wa Mkoa wa Iringa Aidan Ndomba alisema baada ya mkandarasi huyo kukamatwa kikosi kazi chao kinaendelea na uchunguzi wa ujenzi huo ambao thamani yake inaonekana kuwa juu zaidi ya thamani halisi ya jengo.

Alisema mkandarasi huyo alifanya kazi hiyo kwa miaka minne na nusu kwa Sh Bilioni 3.6 bila kumaliza ujenzi huo ambao baadaye uliendelezwa na mkandarasi mwingine na kufanya thamani yake ifike Sh Bilioni 8.8.

“Kwahiyo huu ni uchunguzi mkubwa kwasababu unahusu fedha nyingi. Watu wengi wanaweza kuhusishwa na kashfa hii katika awamu ya kwanza na ya pili ya ujenzi wake,” alisema.

Sunday, 6 May 2018

MBUNGE ROSE TWEVE AVIMWAGIA MAHELA VIKUNDI VYA UWT, ASAS AMUUNGA MKONO

Image result for rose tweve


MBUNGE   wa Viti Maalum  Mkoa  wa  Iringa Rose Tweve (CCM) ametoa Sh Milioni 27 kwa vikundi  45  vya Kuweka na Kukopa (Vicoba) mkoani Iringa watakazokopeshana ili kuinua mitaji ya shughuli zao za ujasiriamali.

Vikundi hivyo vilivyopo katika majimbo mbalimbali ya mkoa wa Iringa vinaundwa na Umoja wa Wanawake Tanzania (UWT)  wa Chama cha Mapinduzi (CCM).

Akizungumzia  azma yake ya kuwawezesha wanawake wa umoja huo, Mbunge Tweve alisema kiasi hicho cha fedha ni sehemu ya Sh Milioni 60 alizoahidi kwa vikundi hivyo vya wanawake katika kata zote 107 za mkoa wa Iringa.

“Fedha nazotoa kwa vikundi hivyo zinatoka katika mshahara wangu kama mbunge ikiwa ni utekelezaji wa ahadi ya kusaidia kuwainua kiuchumi akinamama wa UWT niliyotoa wakati wa kampeni za Uchaguzi Mkuu wa 2015,” alisema.

Alisema  baadhi ya vikundi vilivyoanza kunufaika na utekelezaji wa ahadi hiyo ni pamona na vile vilivyopo katika majimbo ya wilaya ya Mufindi, Kilolo, Isimani na Kalenga.

Alisema mafanikio ya utekelezaji wa mpango huo yamemvutia Mjumbe wa Halmashauri Kuu ya CCM Taifa, Salim Asas ambaye kwa kuunga mkono juhudi hizo ameahidi kuchangia Sh Milioni 53 kwa kata zote za mkoa wa Iringa kwa kupitia Mfuko wa Mbunge Rose Tweve.

“Kazi nzuri tunayoendelea kuifanya kwa wanawake wa UWT katika kata za mkoa wa Iringa imemvutia MNEC, na atachangia kiasi kikubwa cha fedha katika mfuko wa mbunge ili tuendelee kuwawezesha wanawake wengi zaidi wakiwemo pia wale ambao sio wa CCM,” alisema.

Kwa kupitia mpango huo wa kuwawezesha kiuchumi wa wanawake wa UWT katika kata hizo, Tweve alisema amekuwa akichangia Sh 600,000 kwa kila kikundi na kwa vikundi vinavyofanya vizuri vimekuwa vikipewa tuzo ya Sh 400,000.

“Mfano ni kikundi cha Nzihi, Iringa Vijijini ambacho kwasasa kina mtaji wa zaidi ya Sh Milioni nane baada ya kuchangiwa Sh 600,000 kupitia mfuko wangu wa mbunge,” alisema na kuongeza kwamba kikundi hicho tayari kimepewa tuzo hiyo ya Sh 400,000.

Pamoja na mafanikio hayo Tweve alisikitika akisema kikundi cha kata ya Ulanda kimeshindwa kutumia fedha hizo kwa malengo yaliyokusudiwa na badala yake baadhi ya viongozi wake wanatuhumiwa kuzitumia kwa mambo yao binafsi.

“Kikundi kama hicho kiarudisha nyuma jitihada hizi na kwa kweli kuna haja ya kuchukua hatua ikiwa ni pamoja na kuwataka waliohusika warejeshe fedha hizo katika kikundi,” alisema.

Katibu  wa  UWT  Iringa Vjijini, Asha Stambuli alisema jumuiya yao haitasita kuwachukulia hatua kali viongozi watakaohusika na matumizi mabaya ya fedha hizo akisisitiza “fedha hizo sio sadaja ni fedha zinazopaswa kuleta maendeleo kwa wanawake na ndani ya jumuiya.”

Akipongneza juhudi za mbunge huyo, Mwenyekiti  wa UWT  Iringa  vijijini, Lenah Hongole alisema UWT inao mpango wa kuwa na taasisi yake ya kifedha ili kuunga juhudi zinazofanywa na wadau mbalimbali katika kuwainua kiuchumi wanawake na jumuiya hiyo.

Tuesday, 1 May 2018

MAGUFULI AAHIDI KUPANDISHA MISHAHARA YA WAFANYAKAZI

2


RAIS Dk John Magufuli amewataka wafanyakazi kuendelea kujenga uchumi wa nchi huku akiahidi kuwapandishia mishahara kabla kipindi chake cha urais hakijahisha.

Rais Magufuli amesema hayo leo kwenye maadhimisho ya Sikukuu ya Wafanyakazi Duniani ambayo kitaifa yalifanyika mjini Iringa.

Akizungumza katika Uwanja wa Samora zilimofanyika sherehe hizo, Rais Magufuli alisema; “Tunatakiwa tuujenge uchumi wetu ili tujitengenezee maisha mazuri zaidi baadae na siku zote msema kweli ni mpenzi wa Mungu.”

Mbali na kulipa madeni, kutoa ajira mpya , kutoa elimu bure, Dk Magufuli alisema serikali yake inatekeleza miradi mbalimbali ikiwemo ya umeme, reli, viwanja vya ndege, ndege, barabara, afya, elimu na mingineyo ambayo ikamilika itakuza uchumi ambao matokeo yake ni pamoja na kulipa mishahara mizuri zaidi.

Kwa mtazamo wake alisema, serikali yake haiwezi kufanya mambo yote mawili kwa pamoja, kupandisha mishahara na kutekeleza miradi kwa kuwa yote hayo yanategemea chungu kimoja.

“Tuendelee kujenga uchumi wetu ili baadae tuwe na mishahara mizuri, tukitekeleza miradi hii yote nayosema najua hautachukua muda mrefu mishshsra itaoinngezeka na hili halitasubiri hadi mei mosi nyingine ije,” alisema.


Monday, 30 April 2018

SERIKALI YA DK MAGUFULI KUPAISHA UTALII WA KUSINI


RAIS  wa Jamhuri ya Muungano wa Tanzania DkJohn Magufuli ametaja moja ya vipaumbele vya serikali yake kuwa ni pamoja na kupanua wigo wa vivutio vya utalii kusini mwa Tanzania ili sekta hiyo ichangie zaidi kwenye pato la Taifa na kuondoa umasikini katika jamii.

Aliyasema hayo mara baada ya kuizindua Barabara  ya Iringa Migori Fufu ambayo ni sehemu ya barabara ya Iringa Dodoma yenye urefu wa Kilometa 260, katika ziara yake iliyoanza jana mkoani Iringa, itakayokwenda sambamba na kushiriki maadhimisho ya siku ya wafanyakazi duniani ambayo kitaifa yatafanyika mjini Iringa kesho.

Alisema kwa kupitia mkakati huo alisema serikali yake imedhamiria kuufungua utalii wa ukanda wa kusini ambao kitovu chake ni mkoani Iringa kwa kuboresha vivutio na miundombinu.

 “Tumeamua kuukarabati uwanja wa ndege wa Nduli ili uwe wa mkubwa na wa kisasa tutajenga barabara ya lami ya Iringa hadi katika geti la hifadhi ya Taifa ya Ruaha hatua itakayowezesha wageni wengi kuitembelea,” alisema.

Ukarabati wa uwanja wa ndege wa Nduli na barabara ya Iringa hadi katika geti la Hifadhi ya Taifa ya Ruaha ambayo ni hifadhi kubwa kuliko zote nchini utafanywa kupitia mradi wa REGROW uliozunduliwa Februari mwaka mjini Iringa na Makamu wa Rais Samia Suluhu Hassan.

Kwa kupitia mradi huo, Benki ya Dunia imetoa mkopo nafuu wa dola za kimarekani Milioni 150 ambazo ni sawa na zaidi ya Sh Bilioni 340 za Kitanzania kwa ajili ya kusimamia maliasili na kuendeleza utalii wa ukanda wa Kusini.

Mbali na kutengeneza ajira, Dk Magufuli alisema itakapokamilika, mipango hiyo itachochea shughuli za utalii na kuvutia idadi kubwa ya watalii.

Alitoa wito kwa watanzania hususani wa mkoa wa Iringa na mikoa jirani kuanza kujiweka sawa ikiwa ni pomoja na kupata mafunzo ya utalii ili waweze kunufaika na fursa hiyo.

“Ni wajibu wetu kuwahimiza na kuwashawishi vijana wetu wajihusishe na masuala ya utalii ikiwa ni pamoja na kujifunza lugha mbalimbali za nje kama Kispaniola, kifaransa, kijerumani na kingereza,” alisema.

Akitoa mfano wa jinsi vijana wa Zanzibar wanavyonufaika na shughuli za utalii, Dk Magufuli alisema wengi wao wanafanya kazi ya kuongoza watalii baada ya kuiona fursa hiyo na kuichangamkia.

Kwa mujibu wa taarifa za Serikali, sekta ya utalii ina mchango mkubwa katika uchumi wa Taifa ambapo huchangia zaidi ya asilimia 17 kwenye pato la Taifa, asilimia 25 ya mapato yote ya fedha za kigeni na asilimia 12 ya ajira zote nchini.


Mbali na kuwa mgeni rasmi katika maadhimisho ya siku ya wafanyakazi duniani, Dk Magufuli atatumia ziara yake ya siku tano mkoani Iringa kuweka jiwe la msingi ujenzi wa hospitali ya wilaya ya Kilolo, kuzindua kiwanda cha uzalishaji wa chakula cha kuku cha Silverland na kufungua barabara ya Iringa Mafinga.


Saturday, 28 April 2018

RAIS DR JOHN MAGUFULI MGENI RASMI MEI MOSI IRINGA


Friday, 20 April 2018

MAANDALIZI YA MEI MOSI YASHIKA KASI, DK MAGUFULI MGENI RASMI



MKUU wa Mkoa wa Iringa Amina Masenza amewaomba wakazi wa mkoa huo kujitokeza kwa wingi kumlaki Rais Dk John Magufuli anayetarajiwa kuwa mgeni rasmi wa Maadhimisho ya Kitaifa ya Sherehe za Wafanyakazi Duniani (Mei Mosi) yatakayofanyika katika uwanja wa Samora, mjini Iringa.

Pamoja na kushiriki maadhimisho hayo, hiyo itakuwa ni mara ya kwanza kwa Rais Magufuli kukanyaga ardhi ya mkoa wa Iringa tangu achaguliwe kushika wadhifa huo katika Uchaguzi Mkuu wa mwaka 2015.

Akizungumza na wanahabari mapema leo, Masenza amesema; “Mkoa wa Iringa umechaguliwa kuwa mwenyeji wa maadhimisho hayo kitaifa. Hii ni heshima kubwa kwa mkoa wetu kupata fursa hii adhimu.”

Alisema maadhimisho hayo yatatanguliwa na michezo mbalimbali ikiwa ni pamoja na mpira wa miguu, mpira wa pete, kuvuta kamba na kutakuwepo na bonanza la michezo mbalimbali.

“Michezo hiyo inayoshirikisha watumishi wa sekta mbalimbali za umma na binafsi ilianza April 17 na itahitimishwa April 30, siku moja kabla ya kilele cha maadhimisho hayo,” alisema.

Aidha alisema, sherehe hizo za Mei Mopsi zitahusisha maonesho ya shughuli mbalimbali za wafanyakazi, taasisi za umma na binafsi, wawekezaji na wajasiriamali katika uwanja wa Kichangani, Kihesa mjini Iringa.

Akielezea  maandalizi ya  sherehe hizo, alisema kamati mbalimbali zimeundwa kwa maandalizi ya shughuli zote zitakazofanyika kabla na wakati wa maadhimisho.

“Maandalizi yanakwenda  vizuri na  wamepata  ratiba ya  kuzunguka  wilaya  zote za  mkoa  wa Iringa kutoa elimu  pamoja na kututana na  wafanyakazi ili  kujua  changamoto  zao,” alisema.

“Tumejiridhisha kuwa kila kitu kinaenda kama tulivyopanga ndio maana leo tuna uhuru wa kusema kuwa Mei Mosi hii itafanyika kwa mafanikio makubwa mno,” alisema

Aliwataka  wafanyakazi   kujitokeza  kwa  wingi  kushiriki sherehe  hizo  zitakazowawezesha pia kujua mikakati mbalimbali inayolengwa na  serikali katika kuboresha hali za wafanyakazi nchini.

Kauli mbiu ya maadhimisho hayo ni  “Kuunganishwa kwa Mifuko ya Hifadhi ya Jamii Nchini Kulenge Kuboresha Mafao ya Wafanyakazi,”