Thursday, 18 January 2018

KAMPUNI ZIKIWEMO MBILI ZA IRINGA ZAPEWA SIKU TATU KUCHUKUA SUKARI ILIYOKWAMA BANDARINI


SERIKALI imetoa masharti ili kuruhusu kuchukuliwa kwa sukari ya viwandani iliyokwama katika Bandari ya Dar es Salaam ili kuviwezesha viwanda vitano vilivyoagiza visifungwe kwa kukosa malighafi .

Hatua hiyo imefikiwa baada ya juzi Kamati ya Kudumu ya Bunge ya Viwanda, Biashara na Mazingira kuishauri serikali kuruhusu sukari hiyo iliyokuwa inashikiliwa na Mamlaka ya Mapato nchini (TRA), kuchukuliwa ili kuviokoa viwanda hivyo.

Viwanda vilivyolalamika sukari yao kuzuiwa na TRA bandarini ni Kiwanda cha Sayona cha Dar es Salaam na Mwanza, Kiwanda cha Ivory cha Iringa, Kiwanda cha Iringa Food Beverage cha Iringa na Kiwanda cha Anjari cha Tanga.

Aidha kiwanda cha Coca-Cola Kwanza Limited cha Dar es Salaam kililalamika kwa Kamati hiyo ya Kudumu ya Bunge ya Viwanda, Biashara na Mazingira, kutotosha kwa sukari waliyoagiza kutokana na kibali kipya walichopewa na hivyo nao kuwa katika tishio la kufunga kiwanda.

Uamuzi wa kupewa masharti ya mikataba kwa viwanda hivyo, ulifikiwa mjini hapa jana katika kikao kilichowajumuisha Mwenyekiti wa Kamati hiyo, Sadick Murad, Mnadhimu wa Shughuli za Serikali bungeni ambaye pia ni Waziri wa Nchi, Ofisi ya Waziri Mkuu anayeshughulikia Bunge, Jenista Mhagama na Waziri wa Viwanda, Biashara na Uwekezaji, Charles Mwijage.

Majadiliano hayo pia yalimhusisha Waziri wa Fedha na Mipango, Dk Philip Mpango aliyeshiriki kwa njia ya simu na baadaye kufikiwa uamuzi wa viwanda hivyo kupewa masharti ili kuviwezesha kuchukua sukari yao bandarini.

Akizungumzia masharti yaliyotolewa, Mwenyekiti wa Kamati hiyo Murad alisema serikali imeamua kuingia mikataba na viwanda hivyo, ambayo itaviwezesha kuchukua sukari hiyo katika kipindi kisichozidi siku tatu kuanzia jana.

Alisema tangu Rais John Magufuli alipotoa agizo kwa viwanda vinavyotumia sukari kama malighafi ya uzalishaji kwa bidhaa zao mwishoni mwa mwaka jana kama njia ya kuwadhibiti wafanyabiashara wasio waaminifu wanaoagiza sukari hiyo na baadaye kuiuza kwa wananchi, ni viwanda tisa tu vilivyohakikiwa na kupewa vibali vipya.

Kuhusu Coca-Cola alisema kiwanda hicho kilifanyiwa uhakiki na kupewa kibali cha kuagiza sukari kulingana na mahitaji waliyoyaainisha lakini sasa wanalalamika kuwa sukari waliyoagiza imekwisha na wanaomba waruhusiwe kuagiza nyingine, hatua ambayo inalazimisha kiwanda hicho kufanyiwa uhakiki upya ili kujua mahitaji yao halisi.


IRINGA VIJIJINI WAANZA KULIMA KOROSHO










HALMASHAURI ya wilaya ya Iringa imeanzisha kilimo cha korosho kama zao mbadala la biashara la halmashauri hiyo inayolima pia tumbaku na mpunga kwa wingi.

Kilimo cha zao hilo kilizunduliwa na Mkuu wa Mkoa wa Iringa Amina Masenza jana katika kijiji cha Idodi, wilayani humo.

Mbali na kijiji cha Idodi, mkurugenzi wa halmashauri hiyo, Robert Masunya alitaja vijiji vingine ambavyo zao hilo linaweza kustawi vizuri kuwa ni Mahuninga, Mlowa, Ilolompya, Mlenge, Itunundu, Kising’a, Kihorogota, Nyang’oro, Nzihi na Kiwele.

Masunya alisema kwa udhamini wa Bodi ya Korosho, halmashauri hiyo imezalisha miche 69,855 itakayotolewa bure kwa taasisi za elimu (shule za msingi na sekondari) na kwa wananchi wenye mashamba yaliyo tayari kwa ajili ya kupandwa msimu huu wa kilimo.

Kwa kupitia awamu ya kwanza ya mpango huo wa uanzishaji wa kilimo cha zao hilo, mkurugenzi huyo alisema shule za msingi zitapewa miche 3,672 itakayopandwa katika mashamba yao yenye ukubwa wa ekari 136.

“Na shule za sekondari zitapewa miche 378 kwa ajili ya ekari 14 na wananchi watapewa miche 65,803 itakayooteshwa katika ekari 2,437,” alisema. 

Afisa kilimo wa halmashauri hiyo, Lucy Nyalu alisema mbegu zinazotolewa kwa wananchi na taasisi hizo ni za muda mfupi zitakaoanza kutoa mazao baada ya miaka mitatu.

Wakati wa uzinduzi huo, Mkuu wa Mkoa wa Iringa aliwataka wananchi kuitumia fursa hiyo akisema; “Kuanzishwa kwa zao hili wilayani Iringa ni fursa kubwa itakayousaidia mkoa na watu wake kupambana na umasikini na kuongeza mapato yake.”

Awali Mkuu wa Wilaya ya Iringa Richard Kasesela alizungumzia bei ya zao hilo akisema taarifa za hivikaribuni zinaonesha kilo moja ya korosho zilizobanguliwa inauzwa hadi Sh 4,000.

Mkuu wa Mkoa wa Iringa aliwataka maafisa ugani na viongozi wa vijiji, kata na tarafa zinazolima zao hilo kutimiza wajibu wao ili kukifanya kilimo cha zao hicho kiwe chenye tija.

“Tunataka mkoa ufanikiwe katika kilimo cha zao hili na ushauri wangu itungwe sheria ndogo itakayomlazimisha kila mkulima kushiriki katika kilimo hiki kinachotarajiwa pia kuchochea uanzishwaji wa viwanda vya kubangua korosho,” alisema.


“Lakini pia nataka kuona viongozi wa vijiji katika maeneo husika wanakuwa wa mfano kwa kuwa na mashamba darasa ambayo wananchi wengine watayatumia kujifunza,” alisema.

RC MASENZA AWAPA MTIHANI WAKUU WA SHULE MICHANGO MASHULENI




Mkuu wa Mkoa wa Iringa Amina Masenza amekutana na walimu wakuu kutoka wilaya zote za mkoa huo na kuwataka kuandika kwake barua ya mkono wakieleza kama kuna michango katika shule zao.

“Katika barua hizo nataka kila mmoja aeleze  kama katika shule yake kuna aina yoyote ya mchango uliopigwa marufuku, sababu za kuwepo kwake, aliyehidhinisha, kiasi cha mchango na unatolewa kwa ajili ya kazi gani,” alisema leo wakati akizungumza na walimu wa wilaya ya Iringa na Kilolo kabla hajaelekea wilayani Mufindi kwa lengo hilo hilo.

Amechukua uamuzi huo ikiwa ni siku moja tu baada ya Rais Dk John Magufuli kuzuia aina yoyote ya michango kwa wanafunzi mashuleni.


Masenza alitoa onyo kwa walimu watakaotoa taarifa za uongo akisema hatua kali ikiwemo ya kuvuliwa wadhifa wake, zitachukuliwa.

Monday, 15 January 2018

UJENZI WA BARABARA YA NJIA SITA KIMARA KILUVYA WANUKIA

Related image

Ujenzi wa barabara ya njia sita kuanzia Kimara hadi Kiluvya, unatarajia kuanza mwezi ujao pindi mkandarasi atakapopatikana.

Nyumba takribani 2,000 zilizokuwa zimejengwa ndani ya mita 121.5 ya Barabara ya Morogoro zilibomolewa ili kupisha ujenzi huo ikiwa ni hatua ya awali ya utekelezaji.

Kazi ya ubomoaji iliacha vilio kwa wakazi wa maeneo ya Kimara hadi Kiluvya huku nyumba za kifahari zikiwamo za viongozi wa Serikali na wanasiasa maarufu akiwamo Mbunge wa Mikumi, Joseph Haule maarufu kama Profesa J na nyumba ya mke wa Rais mstaafu, Benjamin Mkapa iliyopo Kibanda cha Mkaa Mbezi, zikibomolewa.

Ubomoaji huo pia, ulizikumba nyumba za ibada 32, vituo vya afya vitano, vituo vya mafuta sita majengo ya Serikali manne pamoja na Shule ya Msingi Kimara ambayo ilibomolewa nusu.



ASAS ATOA AHADI TATU ZA MAENDELEO SAWANI AKIPEWA HATI YA UDIWANI










MJUMBE wa Halmashauri Kuu ya Taifa ya Chama cha Mapinduzi (CCM) anayewakilisha mkoa wa Iringa, Salim Asas amefanya mkutano wa kwanza wa hadhara mjini Iringa jana na kutoa ahadi za maendeleo tatu, zinazokuwa za kwanza kutamkwa hadharani tangu achaguliwe kushika wadhifa huo mwezi mmoja uliopita.

Ahadi hizo ambazo utekelezaji wake unaanza wiki hii ni pamoja na kumalizia ujenzi wa jengo la kitega uchumi la kata ya Kihesa linalojengwa pembeni mwa ofisi ya kata hiyo na kuchangia mifuko 200 ya sementi kwa ajili ya ukarabati na ujenzi wa madarasa mapya ya shule ya sekondari ya Kihesa.

Ahadi ya tatu ambayo pamoja na nyingine za kwanza ilipokewa kwa nderemo la vifijo kutoka kwa mamia ya wapenzi na wanachama wa Chama cha Mapinduzi (CCM) waliofurika katika mkutano huo uliofanyika mbele ya ofisi ya kata hiyo ni ya kuchangia shughuli za ujasiriamali zinazotengeneza ajira kwa vijana wa kata hiyo.

Asas alitoa ahadi hizo wakati diwani mteule wa kata hiyo, July Sawani akikabidhiwa na wasimamizi wa uchaguzi wa halmashauri ya manispaa ya Iringa hati yake ya ushindi baada ya kushinda bila kupingwa katika uchaguzi mdogo wa udiwani uliofanyika Januari 13, mwaka huu.

Aliahidi mambo hayo matatu baada ya diwani mteule wa kata hiyo kuzungumzia kero mbalimbali za maendeleo na mikakati yake atakayotumia kuzishughulikia.

“Moja ya kazi ya Mjumbe wa Halmashauri Kuu ya Taifa ni kusimamamia utekelezaji wa Ilani ya CCM. Ilani hii inazungumza maendeleo ya watu. Na kwa kuwa halmashuri zetu hazina mapato ya kushughulikia kero zake zote, zinahitaji ufadhili na michango ya kila mwenye nafasi,” alisema.

Alisema kata ya Kihesa anayoijua yeye ni ile yenye vijana wengi wasio na ajira ambao kwa bahati mbaya wamekuwa wakishughulishwa kwenye siasa badala ya kuhamasishwa kufanya shughuli za maendeleo.

Alisema vijembe na malumbano ya kisiasa katika kata hiyo yanatosha na akawataka vijana hao kuunda vikundi vya ujasiriamali vitakavyowawezesha kufikiwa kirahisi na mipango mbalimbali ya maendeleo.

Kwa upande wake diwani mteule wa kata hiyo aliahidi kutumia mfuko wake binafsi kukarabati barabara ya  Mafifi kwasababu imekuwa kero kubwa kwa wananchi wanaoishi katika maeneo hayo.

“Kazi hii itaanza wiki hii na sio kwa kutumia greda la manispaa, hapana, nitatufuta greda lingine kwa gharama zangu na litaifanya kazi hiyo kuanzia wiki hii,” alisema.

Sawani alizungumzia pia namna wananchi wa kata hiyo wanavyotakiwa kujiondoa na umasikini kwa kufanya kazi yoyote halali na kwa bidii huku akiasa kwamba hakuna kiongozi wa kisiasa wakiwemo madiwani wanaochaguliwa kwa lengo la kugawa fedha kwa wananchi.

“Kuweni na ndoto za kuondokana na umasikini na zitumie ndoto hizo kuja na mikakati na mipango itakayowaondoka katika hatua moja kwenda nyingine ya mafanikio,” alisema.

Sawani aliwashukuru wana CCM, wananchi wa kata hiyo na vyama vingine vya siasa ambavyo kwa heshima yake alisema havikusimamisha wagombea na kumfanya apitwe bila kupingwa.

“Kwa heshima hiyo najiona nina deni kubwa sana kwa wananchi wa kata hii, niombe ushirikiano kutoka kwenu kwasababu mchakato wa maendeleo unaohusisha nguvu zetu wote,” alisema.


Katika mkutano huo uliohudhuriwa pia na viongozi wa CCM wa ngazi mbalimbali, wabunge na wapenzi wa chama hicho, Asas aliwapokea wanachama wapya 53 kutoka Chama cha Demokrasia na Maendeleo (Chadema) na kuwakabidhi kadi za chama chake.

LOWASSA AANIKA ALICHOZUNGUMZA NA RAIS MAGUFULI

Image result for lowassa aweka wazi alichozungumza na magufuli

Mjumbe wa Kamati Kuu Chadema, Edward Lowassa ametoa ufafanuzi kuhusu mazungumzo yake na Rais John Magufuli yaliyofanyika Ikulu Dar es Salaam siku sita zilizopita na kusisitiza kwamba yupo madhubuti kuliko wakati mwingine wowote ule.

Kupitia taarifa yake kwa vyombo vya habari aliyoitoa leo Januari 15, 2015, Lowassa amesema alimueleza masuala mbalimbali yanayowakumba wananchi na wanasiasa tangu Serikali ya Awamu ya Tano iingie madarakani.

 “Nilijadiliana naye kuhusu masuala mbalimbali ya msingi kuhusu nchi yetu ikiwemo kutoheshimiwa kwa Katiba na sheria, uminywaji wa demokrasia, ukiukwaji mkubwa wa haki za binadamu,” amesema na kuongeza,

“Unaohusisha kupotea kwa watu, kuvamiwa, kutishwa na kushambuliwa kwa viongozi wa kisiasa wa upinzani na hali ngumu ya uchumi kwa wananchi wetu. Ni imani yangu kwamba Rais atayazingatia na kufanyia kazi masuala haya kwa masilahi yetu.”

Chanzo; mwananchi

RAIS WA LIBERIA AMALIZA MUDA WAKE KWA KUFUKUZWA KWENYE CHAMA

Image result for Ellen Johnson Sirleaf

Rais anayemaliza muda wake Ellen Johnson Sirleaf amefukuzwa kwenye chama tawala cha Unity Party (UP) ambacho kilimwingiza madarakani na kumwezesha kuongoza kwa miaka 12.

Mbali ya mwanamama huyo mshindi wa Tuzo ya Nobel, viongozi wengine watatu wametupiwa virago kwenye chama hicho ambao ni Seneta wa Kaunti ya River Gee, Commany B. Wesseh; Mjumbe wa zamani wa kamati ya utendaji, Madam Medina Wesseh; na Naibu katibu mkuu Patrick T. Worzie.

Taarifa ya UP iliyotiwa saini na Naibu katibu mkuu wa mawasiliano Mohammed Ali na kusambazwa kwenye vyombo vya habari Jumapili, hatua ya kufukuza rais huyo imetokana na ukiukwaji wa katiba na “vitendo vingine vya kudhuru kuendelea kuwepo na heshima ya chama.”

“Mwenendo wa watu hao waliofukuzwa … ulichangia kukihujumu na kuathiri uwepo wa chama siku zijazo,” ilisema taarifa hiyo.

Taarifa hiyo ilinukuu Ibara ya VII ya chama inayofafanua wajibu, haki na mamlaka ya wajumbe wa UP ambayo inadaiwa yalivurugwa na Rais.

“Sehemu ya 1(e) inaelezea jukumu la wanachama kwenye uchaguzi; (e) kumuunga mkono mgombea wa Unity Party kipindi chote cha uchaguzi na kumpatia msaada mwingine wowote ulio katika uwezo kwa ajili ya mgombea yeyote wa Unity Party katika uchaguzi wowote; na (f) kuwa na mwenendo ambao utakipatia heshima chama katika uchaguzi wowote;” ilisema taarifa hiyo kuhusu katiba.


Katika uchaguzi uliopita, mwanasoka nyota wa zamani duniani George Weah alimshinda mgombea wa UP, makamu wa rais Joseph Boakai. Weah ataapishwa Januari 22.

Friday, 12 January 2018

BAADA YA LOWASSA, RUNGWE NAYE ATAKA KUKUTANA NA RAIS MAGUFULI

Image result for rungwe hashim

Mwenyekiti Chama cha Chaumma, Hashim Rungwe amesema anatamani kwenda Ikulu kuonana na Rais John Magufuli ili kumweleza mambo ambayo yatawezesha kusaidia kuleta mabadiliko katika utawala wake.

Rungwe amesema kila mtu anatamani kuonana na Rais Magufuli lakini nafasi hiyo imekuwa haipatikani.

Rungwe anatoa kauli hiyo leo ikiwa imepita siku tatu tangu waziri mkuu wa zamani, Edward Lowassa alipofanya ziara Ikulu na kuzungumza na Rais Magufuli.

“Hata mimi nataka kuonana na Rais, nimekuwa natamani sana lakini hatupati nafasi hiyo, nikikutana naye tutazungumza mambo mengi, ambayo yatamsaidia yeye mwenyewe katika uongozi wake,” amesema Rungwe na kuongeza; “Sisi upinzani tulikuwa tunasema hatutaki mafisadi, hatutaki wabidhirifu au tunapiga kelele dawa hakuna hospitalini kwa hiyo anapopeleka dawa hospitalini ni sisi tumesaidia, kwa hiyo kuongoza ni kusikiliza watu wanasema nini wakati mwingine.”

Chanzo; Mwananchi

MAWAKILI WAKUSANYA MILIONI 138 KUSAIDIA MATIBABU YA LISSU

Image result for tundu lissu

Chama cha Mawakili Tanganyika (TLS) kimesema kimefanikiwa kukusanya Sh138 milioni kugharamia matibabu ya Rais wa Chama hicho, Tundu Lissu aliyelazwa Hospitali ya Chuo Kikuu cha Leuven nchini Ubelgiji.

Taarifa iliyotolewa na Makamu Mwenyekiti wa TLS, Godwin Ngwilimi imesema kiasi hicho wamekipata kutoka kwa watu mbalimbali wa ndani na nje ya nchi wakiwemo wanachama wa chama hicho waliojitolea kuchangia.

Kuhusu mchanganuo wa fedha hizo, Ngwilimi amesema kimetumika kulipa gharama za matibabu ya Lissu katika Hospitali ya Nairobi, Leuven na kugharamia visa kwa watu watatu wakiwa nchini Ubelgiji.

Ngwilimi ametoa shukrani kwa wale wote waliojitokeza kuchangia matibabu ya Lissu ambaye pia ni mbunge wa Singida Mashariki na mwanasheria mkuu wa Chadema.

Lissu alishambuliwa kwa risasi zaidi ya 30 na watu wasiojulikana Septemba 7, 2017 akiwa katika makazi yake mjini Dodoma ambapo alipelekwa Hospitali ya Rufaa ya Dodoma na usiku wa siku hiyo alihamishiwa Hospitali ya Nairobi alikolazwa hadi Januari 6 kabla ya kahamishiwa Leaven, Ubelgiji kwa mazoezi ya viungo na saikolojia.

MEYA ADOKEZA HATMA YAKE MADIWANI IRINGA MJINI WAKIPUKUTIKA

Image result for madiwani wa chadema Iringa Manispaa

IDADI ya madiwani wa jimbo la Iringa Mjini waliochaguliwa katika Uchaguzi Mkuu wa mwaka 2015 kupitia Chama cha Demokrasia na Maendeleo (Chadema) inazidi kuputika baada ya diwani mwingine, Oscar Kafuka wa kata ya Mkwawa kutangaza kujiuzulu jana usiku.

Kafuka anakuwa diwani wa sita kubwaga manyanga katika kipindi cha miezi minne iliyopita kutokana na sintofahamu ya uongozi inayoendelea ndani ya chama hicho.

Kujiondoa kwa madiwani hao kunaifanya Chadema iliyonyakua viti 14 kati ya 18 vya udiwani katika jimbo hilo mwaka 2015 na kufanikiwa kubeba halmashauri ya manispaa ya Iringa, kubakiwa na madiwani nane ambao pia hakuna mwenye uhakika kama wote wataendelea kuzitumikia nafasi hizo hadi mwaka 2020 utakapofanyika uchaguzi mkuu mwingine.

Wakati Chadema ikibakiwa na madiwani nane wa kuchaguliwa, Chama cha Mapinduzi (CCM) kwa upande wake kimeongeza idadi ya madiwani kutoka wanne hadi sita hiyo ikiwa ni baada ya kushinda katika uchaguzi mdogo katika kata ya Kitwiru na mgombea wake kupita bila kupingwa katika kata ya Kihesa.

Aidha CCM inatarajia kushinda katika kata zingine nne zilizowazi hasa kwa kuwa Chadema kwa kupitia Mwenyekiti wake Freeman Mbowe ilikwishatangaza kutoshiriki uchaguzi mdogo wowote kwa madai kwamba chaguzi hizo haziko huru na haki; jambo litakaloifanya iwe katika nafasi nzuri ya kuongeza madiwani wake hadi 10.

Tarifa za kujiuzulu kwa madiwani wa Chadema kunazidi kupokelewa kwa nderemo na vifijo na wanachama na viongozi wa CCM.

Mwenyekiti wa CCM wa Manispaa ya Iringa Said Rubeya alisema; “Hatukuamini macho yetu tulipopoteza jimbo na halmashauri katika Uchaguzi Mkuu wa 2015 na sasa hatuamini macho yetu jinsi yanavyoshuhudia madiwani wa Chadema wakijiengua katika chama hicho.”

Rubeya alisema kwa maamuzi hayo ya madiwani wa Chadema, CCM inajiona ipo katika mazingira mazuri ya kuirudisha halmashauri ya manispaa ya Iringa katika mikono yake.

“Endapo Chadema itapoteza madiwani wengine wawili, hakuna shaka meya wa sasa atakuwa amepoteza mamlaka ya kuendelea kukikalia kiti hicho na hivyo baraza la madiwani wa manispaa ya Iringa litalazimika kuchagua meya mwingine na endapo itakuwa hivyo hakuna shaka CCM watakuwa katika nafasi nzuri ya kutwaa kiti hicho,” alisema.

Akizungumzia hamahama ya madiwani wao na hatma yake, Mstahiki Meya wa Manispaa ya Iringa Alex Kimbe alisema jambo hili linawaumiza wapenda mageuzi wengi kwani walipowachagua madiwani kutoka upinzani hawakujua kama hatma yake itakuwa kutoswa katikati ya njia.

“Walipoanza kuondoka na kujiunga na CCM, tumekuwa tukifanya vikao, bahati mbaya madiwani wanaohama, wamekuwa wakiapa mbele ya vikao kwamba hawana sababu na hawawezi kufanya hivyo. Lakini yanayotokea ndio hayo,” alisema.

Kama Meya wa manispaa hiyo alisema anaiona dalili ya kupoteza kiti hicho kwa CCM lakini akajipa moyo akisisitiza; “sikuzaliwa kuwa meya na kwamba hayo ni majukumu ya kupokezana ambayo matokeo yake uamriwa kwa kura.”

“Ombi kwa wanamageuzi wenzangu, tusikate tamaa, kuna kimbunga cha ajabu kinapita katika chama chetu, tukumbuke hakuna jambo lisilo na mwisho, nina hakika mambo yatakaa sawa,” alisema huku akisisitiza kwamba hafikirii kuhama chama hicho kama walivyofanya madiwani wenzake na akawaomba pia wenzake waliobaki wasiwakimbie wapiga kura wao kwa kuhama chama hicho.

Akizungumza na wanahabari jana, diwani aliyejiuzulu alisema; “Nimeamua kujiuzulu kwa hiari yangu mwenyewe baada ya kuona napoteza muda mwingi katika nafasi hii na kwa kuzingatia ahadi nyingi nilizotoa wakati wa uchaguzi mkuu uliopita sasa zinatekelezwa na serikali ya Dk John Magufuli kwa kasi kubwa.”


Kwa muktadha huo, Kafuka alisema haoni tena sababu ya kuendelea na wadhifa huo na kujishughulisha na mambo ya kisiasa kwasasa na badala yake anataka kuitumia familia yake na kuendeleza shughuli zake za ukandarasi zilizoanza kuyumba baada ya kuwa diwani.

“Nichukue nafasi hii kuwashukuru wananchi wa kata yangu na manispaa ya Iringa kwa ushirikiano walionipa katika kipindi nilichokuwa diwani wao na kufanikiwa kutekeleza majukumu mbalimbali ya kuwaletea maendeleo,” alisema.

Thursday, 11 January 2018

KESI YA MEYA MANISPAA YA IRINGA YAPIGWA TENA KALENDA



MSTAHIKI Meya wa Manispaa ya Iringa, Alex Kimbe anayetuhumiwa kutishia kuua kwa kutumia bastola atapanda katika kizimba cha Mahakama ya Wilaya Iringa Januari 29, 2018 baada ya mapema leo hakimu mkazi mwandamizi wa Mahakama hiyo, Richard Kasele, kuihairisha tena ikiwa tayari imekwishatajwa mara tatu.

Kesi hiyo ya jinai namba 189 ya mwaka 2017 iliyoelezwa na Wakili wa Serikali, Alice Thomas kwamba upelelezi wake bado haujakamilika, ilifikishwa kwa mara ya kwanza katika mahakama hiyo Novemba 28, mwaka jana.

Kimbe anashitakiwa kutenda kosa hilo Novemba 26 mwaka jana katika kata ya Kitwiru mjini Iringa wakati wananchi wa kata hiyo wakipiga kura katika uchaguzi mdogo wa udiwani wa kata hiyo.

Katika kesi hiyo Kimbe anashitakiwa kutishia kumuua kwa bastola Katibu wa Umoja wa Vijana wa Chama cha Mapinduzi (UV CCM) Manispaa ya Iringa, Alphonce Muyinga kinyume na kifungu namba 89 (2) (a) cha kanuni za adhabu.
  
Wakati Meya huyo akisubiri kujitetea katika kesi hiyo, chama chake, Chama cha Demokrasia na Maendeleo (Chadema) mjini Iringa kinaendelea kupata nyufa zinazozidi kukisambaratisha.

Katika kipindi cha miezi minne iliyopita, idadi ya madiwani waliochaguliwa atika Uchaguzi Mkuu wa 2015 kupitia chama hicho imepungua kutoka 14 hadi tisa, hiyo ikiwa ni baada ya madiwani watano wa kata ya Kitwiru, Kihesa, Ruaha, Kwakilosa na Mwangata kwa nyakati tofauti kutangaza kujitoa katika chama hicho na kutimkia Chama cha Mapinduzi (CCM).


Pamoja na madiwani hao wa kuchaguliwa, chama hicho kimepoteza pia madiwani wa viti maalumu watatu kati ya watano kilionao ambao hata hivyo nafasi zao zitajazwa kwa kuzingatia orodha ya madiwani wa viti maalumu waliopelekwa katika Tume ya Taifa ya Uchaguzi.

Monday, 8 January 2018

DC AFIKISHA SALAMU ZA MAENDELEO KWA WANA KILOLO WAISHIO DAR




MKUU wa wilaya ya Kilolo Asia Abdallah amekutana na wana Kilolo zaidi ya 200 waishio jijini Dar es Salaam katika mkutano alioutumia kunadi fursa za wilaya hiyo zinazoweza kuchochea uchumi wa viwanda na ukuaji wa sekta zingine.

Katika mkutano huo uliofanyika jana kwenye ukumbi wa hoteli ya Travertine Magomeni, Abdallah aliambatana na Mbunge wa Jimbo la Kilolo, Venance Mwamoto, mkurugenzi wa Halmashauri na viongozi wa Chama cha Mapinduzi (CCM) wa wilaya hiyo.

“Mtu wa kwanza kuijenga wilaya ya Kilolo ni mwana Kilolo mwenyewe, tumeamua kuwafuata Dar es Salaam ili tufahamiane na kuwakumbusha umuhimu wenu na ushiriki wenu katika kuzitumia fursa hizo kuleta maendeleo,” alisema.

Alisema hatua hiyo imekuja baada ya shughuli hiyo ya uhamasishaji kufanyika kwa kiwango cha kuridhisha ndani ya mipaka ya wilaya hiyo na kuanza kuonesha mafanikio.

Alisema katika sekta ya kilimo, wilaya ya Kilolo ina ardhi nzuri inayofaa kwa kilimo cha mazao ya chakula na biashara ambayo kwa wingi wake yanaweza kuchochea uanzishwaji wa viwanda vidogo, vya kati na vikubwa.

“Kilolo tunalima nyanya, vitunguu, viazi, mahindi na matunda ya aina mbalimbali kwa wingi, tuna miundombinu ya umwagiliaji, mito mingi na hali ya hewa nzuri inayofaa pia kwa kilimo cha chai, pareto na miti, na ufugaji ukiwemo wa nyuki na samaki,” alisema.

Aidha alizungumzia mabadiliko makubwa katika sekta nyingine ikiwemo ya afya, elimu, maji, utalii, mundombinu, nishati na umeme, na mawasiliano akisema kwa pamoja ni muhimu katika kufikia malengo ya wilaya hiyo.

Akizungumzia mazingira ya uwekezaji, Mkurugenzi wa halmashauri ya wilaya ya Kilolo, Aloyce Kwezi alisema wana ardhi kubwa ikiwemo ile inayofaa kwa kilimo cha uwagiliaji na kuna maeneo na viwanja vya kutosha kwa ajili ya uwekezaji wa miradi mbalimbali na nyumba za makazi.

Kwa upande wake Mbunge wa jimbo hilo, Venance Mwamotto alisema; “Tunaridhishwa na kasi iliyopo ndio maana tunawafuata wadau wetu wengine nje ya wilaya. Kama mbunge wajibu wangu ni kuisukuma serikali kuzishughulikia kero mbalimbali zinazokwamia au kuchelewesha maendeleo. Niipongeze serikali kwani katika eneo hili inajitahidi sana.”

Wakiitikia wito wa kurudi na kuindeleza wilaya hiyo, wananchi hao walichanga zaidi ya Sh Milioni 8, fedha taslimu na ahadi, ili kusaidia kuboresha sekta ya elimu na afya, waliyosema ni muhimu kwa ukuaji wa mandeleo ya wilaya na wakakubalina kukutana mara mbili kwa mwaka ili kufanya marejeo ya ushiriki wao.

Aidha, Mkuu wa Chuo Kikuu cha Aga Khan (AKU), Profesa Joe Lugalla ambaye ni mmoja a wadau wa maendeleo ya wilaya hiyo aliahidi kuchangia maendeleo ya wilaya hiyo kwa kuandika maandiko ya miradi mbalimbali inayohitaji msaada wa fedha kutoka kwa wahisani kama njia ya kuharakisha utafutaji na upatikanaji wa fedha hizo.