Thursday, 14 June 2018

ASAS KULETA LIGI KUBWA YA MPIRA WA MIGUU MKOANI IRINGA



MKOA wa Iringa unatarajia kuingia katika ligi ya mpira wa miguu kubwa kuliko zote zilizowahi kutokea; baada ya Mjumbe wa Halmashauri Kuu ya Taifa ya CCM, Salim Asas kutangaza kumwaga vifaa mbalimbali vya michezo kwa matawi yote 549 ya chama hicho.

Vifaa hivyo ambavyo thamani yake haikuwekwa bayana japokuwa vinaelezwa kuwa na thamani ya zaidi ya Sh Milioni 150 vinajumuisha mipira na jezi  zitakazotolewa kwa timu 549 za matawi hayo.

Akitoa taarifa hiyo kwa wajumbe wa halmahauri kuu za CCM za wilaya zote za mkoa wa Iringa katika ziara yake aliyofanya katika wilaya hizo hivikaribuni, Mwenyekiti wa CCM Mkoa wa Iringa Albert Chalamila alisema vifaa hivyo vya kisasa vimeagizwa toka nje ya nchi.

“Najua thamani ya mpira mmoja ni Sh 120,000 na seti moja ya jezi Sh 200,000, kwahiyo zote zinaweza kuwa zimegharimu zaidi ya Sh Milioni 150,” alisema.

Alisema wakati matawi hayo yakisubiri kugaiwa vifaa hivyo wanatarajia taratibu za kuunda timu za vijana katika kila tawi zitaanza kuunda ili zishiriki ligi kubwa itakayopigwa kwa ngazi ya matawi, kata, wilaya na hadi mkoa.

“Tunataka kila mahali uchezwe mpira wa miguu na kwa kufanya hivyo tutakuwa tunachangia juhudi za serikali za kuinua mchezo wa soka nchini kama ilivyofafanuliwa katika Ilani yetu,” alisema.

Kwa kupitia mpango huo, Chalamila alisema kila tawi litapa mpira mmoja na seti moja ya jezi, vifaa vitakavyowawezesha kushiriki katika ligi hiyo.

Wakati huo huo Chalamila alisema matawi 75 ya chama hicho Iringa Mjini yamekwishapewa mpira mmoja mmoja na kwa upendeleo yatapewa tena mipira hiyo na jezi baada ya taratibu kukamilika.

“Jicho la CCM lipo Iringa Mjini, na jimbo hilo linaongozwa na Chadema, kwahiyo ni muhimu tukawapa upendeleo kwa manufaa ya chama,” alisema.

Sunday, 10 June 2018

CHALAMILA APIGANIA NYONGEZA YA POSHO ZA VIONGOZI WA CCM





MWENYEKITI wa Chama cha Mapinduzi (CCM) Mkoa wa Iringa Albert Chalamila ameonekana kutoridhishwa na kiwango cha posho wanazolipwa viongozi wa chama hicho wakati wakihudhuria vikao mbalimbali na kuagiza watendaji kufanya maandalizi ya kutosha kabla ya vikao hivyo.

Katika ziara yake ya kwanza tangu achaguliwe kushika wadhifa huo mwishoni mwa mwaka jana aliyofanya wiki iliyopita katika wilaya za kichama za Mufindi, Iringa Vijijini na Iringa Manispaa, Chalamila alijikuta akilazimika kutoa fedha yake ya mfukoni kuchangia posho za wajumbe wa halmashauri kuu za CCM wa wilaya hizo.

Alipokutana na halmashauri ya CCM wilaya ya Mufindi, Chalamila alichangia Sh Milioni 2.5 kwa wajumbe wa kikao hicho ikiwa ni nyongeza ya Sh 15,000 kwa kila mjumbe baada ya Katibu wa wilaya hiyo Elirehema Nassar  kutoa taarifa kwamba wangelipwa kati ya Sh 10,000 na 30,000 kutegemea na umbali wanaotoka.

Akiwa Iringa Vijijini mwenyekiti huyo aliyekuwa pia Mjumbe wa Kamati ya Kuhakiki Mali za Chama iliyoundwa mapema mwaka huu na Mwenyekiti wa CCM Taifa, Dk John Magufuli alichangia Sh Milioni 2.3 ikiwa ni nyongeza ya Sh 15,000 kwa kila mjumbe baada ya Katibu wa CCM wa Iringa Vijijini, Dodo Sambu kusema walipanga kuwalipa nauli ya Sh 10,000 kila mmoja kutokana na ufinyu wa bajeti.

Juzi Jumamosi, Chalamila alikutana na halmashauri ya CCM ya Manispaa ya Iringa na kuchangia Sh Milioni 1.5 ikiwa ni nyongeza ya Sh 20,000 kwa kila mjumbe baada ya Katibu wa CCM wa manispaa hiyo, Marko Mbanga kutoa taarifa kwamba stahiki ya wajumbe wa kikao hicho ni nauli ya Sh 5,000 kwa kila mmoja.

Akizungumza kwa nyakati tofauti na wajumbe wa vikao hivyo, mwenyekiti huyo alisema angependa kuona wajumbe wa vikao hivyo nyeti wanaofanya kazi kubwa ya kukijenga chama hicho kwa kujitolea wanalipwa posho inayolingana na hadhi yao.

“Nitafurahi nikiona wajumbe wanalipwa hata zaidi ya Sh 100,000 kwa kila kikao wanachohudhuria kutokana na hadhi yao,” alisema.

Alisema katika maeneo mengi ya mkoa wa Iringa, CCM ina miradi mingi iliyoendelezwa, iliyo katika hatua ya kuendelezwa na inayotakiwa kuendelezwa ambayo kama itasimamiwa vizuri inaweza kukiwezesha chama hicho kuboresha posho na maslai ya viongozi na watumishi wake.

Akitoa mfano wa baadhi ya mali za chama hicho zilivyokuwa zikitumika vibaya, Chalamila alisema, wafanyabishara waliopanga katika maghala yaliyopo katika uwanja wa Samora walikuwa wakilipa kiasi kidogo sana cha fedha kwa mwezi kabla mikata hiyo haijarekebishwa.

“Wafanyabiashara hao walikuwa wakilipa fedha ndogo sana kwa kisingizio kwamba maghala hayo walijenga wao wenyewe. Nikasema hii haikubaliki na ni bora waondoke au tubomoe maghala hayo,” alisema.

Katika kupunguza mianya ya upotevu wa fedha za chama hicho, Katibu wa CCM Mkoa wa Iringa Christopher Magala alisema chama hicho kimepiga marufu wapangaji wake kupangisha majengo yake wapangaji wengine.

“Tunaendelea kufuatilia na kuwatambua wote waliopangishwa majengo ya CCM na watu baki ili wawe wapangaji wetu halali, hatutaki biashara ya mtu kati kwani biashara hii imekuwa ikiwanufaisha watu baki badala ya chama; mpangaji wetu ni lazima awe yule mwenye mkataba na chama na si vinginevyo,” alisema.

Aidha alisema mwa CCM yoyote atakayebainika kutumia kwa maslai yake binafsi mali za chama hicho au kutafuna fedha za chama kinyume na taratibu atafikishwa katika vyombo vya dola na kushitakiwa kama mwizi mwingine yoyote.

CHALAMILA AKABIDHI MIPIRA 75 KWA MATAWI YA CCM IRINGA MJINI





MWENYEKITI wa Chama cha Mapinduzi (CCM) Mkoa wa Iringa Albert Chalamila ametoa mipira 75 kwa ajili ya matawi 75 ya chama hicho Iringa Mjini itakayotumika kuanzisha timu na ligi itakayotumiwa kuhamasisha michezo na shughuli za chama hicho.

Mipara hiyo ya kisasa iliyonunuliwa na Mjumbe wa Halmashauri Kuu ya CCM Taifa, Salim Asas ilikabidhiwa jana kwa mwenyekiti wa CCM Manispaa ya Iringa, Said Rubeya katika hafla fupi iliyohudhuriwa pia na baadhi ya wajumbe wa halmashauri kuu ya CCM ya Manispaa hiyo.

Pamoja na mipira hiyo ya awali, Asas ameahidi kutoa seti moja ya jezi na mpira mwingine mmoja mmoja kwa timu za matawi hayo ili kuziwezesha kujiandaa vizuri na mashindano hayo.

“Ligi hiyo itakuwa sehemu ya mkakati wa chama chetu kutangaza utekelezaji wa Ilani na kuhamasisha wanachama kujiandaa na chaguzi mbalimbali zijazo,” alisema Chalamila.

Pamoja na mkakati huo alisema CCM inatambua umuhimu wa michezo kwa afya za watanzania na chanzo kizuri cha ajira.

“Hakuna asiyejua jinsi michezo inavyolipa. Kuna mabadiliko makubwa katika michezo hasa wa soka nchini na hamasa imekuwa ikiongezeka siku hadi siku kwani mchezo huo unalipa kuliko kazi nyingi,” alisema huku akitoa mfano wa mishahara mikubwa ya baadhi ya wachezaji wa ndani na nje ya nchi.

Friday, 8 June 2018

ALIYEMUHONGA AFISA WA SUMATRA IRINGA AHUKUMIWA JELA MIAKA 3, ALIPA FAINI

Image result for mahakama

MAHAKAMA ya Hakimu Mkazi Iringa imemtia hatiana na kumuhukumu Emmanuel Mwipopo (41) mkazi wa Kihesa mjini Iringa kifungo cha miaka mitatu jela au kulipa faini ya Sh 500,000 kwa kosa la kutoa hongo kinyume na kifungu cha sheria ya Kuzuia na Kupambana na Rushwa Namba 11 ya mwaka 2007.

Mwipopo alifikishwa katika mahakama hiyo akituhumiwa kumuhonga Sh 100,000 Afisa Mfawidhi wa Sumatra mkoa wa Iringa, Patel Ngereza ili abadilishiwe njia ya gari lake la kusafirishia abiria maarufu kama daladala.

Alifikishwa kwa mara ya kwanza mahakamani hapo Agosti 9, 2017 na kusomewa shtaka hilo na mwendesha mashtaka wa Takukuru , Elisante Fundisha.

Akisoma hukumu ya shauri hilo hivikaribuni, Hakimu Mfawidhi wa mahakama hiyo, David Ngunyale alisema mahakama imetoa adhabu hiyo baada ya kuridhishwa na ushahidi uliotolewa na upande wa mashtaka.

Ilielezwa mahakamani hapo kuwa kati ya Februari na Machi mwaka 2017 mshtakiwa akiwa wakala wa gari ya biashara lenye namba T546 DFT Toyota Hiace mali ya Saul Malogo alimshawishi na kumuhonga jumla ya Sh 100,000 aliyekuwa Meneja wa Sumatra mkoani Iringa ili abadilishiwe njia.

Kwa kutumia simu yake ya mkononi, Machi 2, 2017 Mwipopo alituma kwa afisa huyo wa Sumatra kiasi hicho cha fedha kwa kupitia wakala wa M-Pesa ili kutimiza azma yake ya kumshwishi kubadilisha gari njia ya gari hilo.

Mwipopo alitaka gari hiyo iliyokuwa ikifanya safari zake kati ya Barabara Mbili na Viwengi, iwe inafanya safari kati ya Stendi Kuu na Chapuya.

Alikamatwa na kufikishwa mahakamani hapo baada ya Takukuru kupokea taarifa hiyo.

Kufuatia hukumu hiyo,  Mwipopo alilipa faini hatua iliyomuwezesha kukwepa kifungo cha miaka mitatu jela.

Akizungumza na wanahabari baada ya hukumu hiyo, Mkuu wa Takukuru Mkoa wa Iringa, Aidan Ndomba ametoa wito kwa wakazi wote kutofumbia macho rushwa kwa kutoa ushirikiano kwa taasisi hiyo ili iwezi kuchukua hatua za haraka

WANAWAKE 363 KIJIJINI MLANDA WAPATA HATI MILIKI ZA ARDHI




WANAWAKE 363 sawa na asilimia 48 ya wananchi 772 waliopata hati miliki za kimila 1,777 katika kijiji cha Mlanda wilayani Iringa wamesema, hatua hiyo italinda umiliki wa ardhi waliyopata ambayo awali usimamizi na manufaa yake yaliwalenga zaidi wanaume katika familia zao.

Hati hizo zimetolewa kupitia Mradi wa Urasimishaji Ardhi (LTA) unaotekelezwa katika vijiji 36 vya wilaya hiyo chini ya Mpango wa Kupunguza Njaa na Utapiamlo (Feed the Future) unaofadhiliwa na Shirika la Maendeleo la Kimataifa la Marekani (USAID).

Akiwakabidhi hati hizo kijijini hapo hivikaribuni, Mkurugenzi wa Halmashauri ya Wilaya ya Iringa, Robert Masunya aliupongeza mradi huo akisema umejenga uelewa wa haki za wanawake na jamii katika kumiliki ardhi na umesaidia kuwahamasisha kutumia nafasi waliyopewa kuomba ardhi ambayo ni rasilimali muhimu katika kukuza kipato chao.

Mmoja wa wanawake walionufaika na mpango huo, Zilpa Mgata alisema wanafurahi kuona mila na desturi zilizokuwa zikiwanyima haki ya kumiliki ardhi katika jamii zao zinapoteza nguvu zake mbele ya sheria mbalimbali za ardhi. 

“Tumeelimishwa jinsi sheria hizo zinavyoondoa tofauti za umiliki wa ardhi baina ya mwanamke na mwanaume, jamii inajua na imeanza kuuona umuhimu wa mwanamke kutobaguliwa katika umiliki wa ardhi,” Mgata alisema na kueleza jinsia atakavyokitumia ardhi aliyomilikishwa yenye ukubwa wa heka tatu kutafuta mikopo na kuwekeza katika shughuli za kilimo na ufugaji.

Awali Naibu Mkurugenzi wa LTA, Malaki Msigwa alikipongeza kitengo chao cha uelimishaji akisema kimewazindua wanawake wengi kuelewa haki yao ya kumiliki ardhi na kutumia sheria hizo kupata haki hiyo.

“Hili ni jambo la kujipongeza sana ni jambo linaloonesha mafanikio makubwa katika jamii zetu. Sio suala la mchezo leo hii kushuhudia asilimia 48 ya wananchi waliopata hati hizi zinazowapa haki ya kumiliki ardhi ni wanawake,” alisema.

Mbali na wanawake hao, Msigwa alisema wanaume 409 sawa na asilimia 52 ya wananchi hao nao wamenufaika na mpango huo unaothibitisha umiliki na utumiaji wa ardhi kwa mmiliki, unaopunguza migogogo, unaomlinda mmiliki kulipwa fidia na unaomuwezesha kuitumia kama dhamana mahakamani au katika taasisi za fedha kuomba mikopo.

Mwenyekiti wa kijiji hicho, Vitalis Samila alisema kijiji cha Mlanda kipo katika kata ya Magulilwa, tarafa ya Mlolo, umbali wa Kilometa 25 kutoka mjini Iringa.

Akizungumzia utekelezaji wa mpango huo kwa ngazi ya wilaya alisema, mradi huo utakaotekelezwa hadi Novemba 2019, umekamilisha matumizi bora ya ardhi katika vijiji 28 tangu utekelezaji wake uanze Januari 2016, umepima vipande vya ardhi 40,000 na umeshatayarisha hati 37,000.

Msigwa alisema mradi umepokea ombi la halmashauri hiyo la kutekeleza mpango huo katika vijiji 97 vilivyobaki na unaendelea kulifanyia kazi.

Ombi hilo lilitolewa na mkurugenzi wa halmashauri ya wilaya hiyo aliyetaka halmashauri yake iwe ya kwanza na ya mfano nchini kwa kuwa na vijiji vyote vyenye mpango wa matumizi bora ya ardhi.

CHALAMILA AWAVAA WALIOANZA KAMPENI ZA UBUNGE, UDIWANI MUFINDI





MWENYEKITI wa Chama cha Mapinduzi (CCM) Mkoa wa Iringa Albert Chalamila ametoa onyo kali kwa wana CCM walioanza kampeni za chini kuwania ubunge na udiwani katika majimbo matatu ya wilaya ya Mufindi akisema wanakwenda kinyume na kanuni za uongozi na maadili.

Majimbo hayo ni Mafinga Mji linaloongozwa na Mbunge Cosato Chumi, Mufindi Kaskazini Mahamudu Mgimwa na Mufindi Kusini Meldrad Kigolla.

Alitoa onyo hili jana, wakati akizungumza na wajumbe wa halmashauri kuu ya CCM ya wilaya hiyo mjini Mafinga alipokuwa akielezea mwelekeo wake wa usimamizi wa shughuli za chama katika kipindi cha uongozi wake tangu ashike wadhifa huo mwishoni mwa mwaka jana.

Kwa kutumia macho yake na taarifa za vyombo vya chama na vya dola (Usalama wa Taifa) alisema ameanza kuwabaini baadhi ya wana CCM walioanza kujitengenezea mazingira kwa ajili ya kupata uteuzi katika uchaguzi mkuu ujao kinyume na kanuni hizo za chama.

Bila kuwataja majina, mwenyekiti huyo kijana aliwataka wana CCM hao kuanza kufuta ndoto hizo akisema chama kitatumia kanuni na katiba yake kuwaengua na ikiwezekana itawanyang’anya kadi mapema iwezekanavyo ili kuondoa mipasuko inayoweza kuwagharimu katika Uchaguzi Mkuu ujao.

Katika mazingira ya kusikitisha alisema wana CCM wengine wanaoshiriki kuhatarisha amani ndani ya chama hicho ni wale waliopewa dhamana ya kuwa wajumbe wa vikao vikubwa vya chama na katika onyo lake kwao aliwatahadharisha dhidi ya hatua zinazoweza kuchukuliwa kwao.

“Waacheni wabunge na madiwani waliopo wafanye kazi, wamalize miaka yao mitano kwa uhuru. Mliwachagua wenyewe, wapeni nafasi na kama mnataka kuamua vinginevyo subirini hadi pazia la uchaguzi litakapofunguliwa lakini sio sasa,” alisema.

Katika mwelekeo wake mwingine, Chalamila alizungumzia visasi na mioyo ya kinyongo miongoni mwa wana CCM wakati na baada ya chaguzi za chama na jumuiya zake, na za serikali akisema; mambo hayo yamekuwa yakisabisha mpasuko wa muda mrefu ndani ya chama hivyo ni lazima yaachwe.

“Visasi na vinyongo vimevuka mipaka. Wapo pia wana CCM ambao kila kukicha kazi yao ni kuwazushia na kuwachafua wenzao kwamba ni wafuasi wa vyama vingine vya siasa kikiwemo Chama cha Demokrasia na Maendeleo (Chadema) na kwamba wana mienendo mibaya ndani ya chama mambo ambayo si ya kweli. Wana CCM tupendane na tutendeane mema,” alisema.

Aliwataka wenye taarifa za wanachama wenye mienendo mibaya na inayotishia uhai wa chama waziwasilishe kwa kuzingatia taratibu, kanuni na katiba ya chama ili ziweze kufanyiwa kazi.

Alitaja mwelekeo wake mwingine katika uongozi wake kuwa ni kuendesha chama kwa kuzingatia msingi wa siasa safi zisizo na majungu ili kulinda taswira ya mkoa wa Iringa ulioharibiwa na siasa za majungu huko nyuma.

Na katika kufikia lengo hilo, aliahidi pia kukutana na wabunge wote wa CCM wa mkoa wa Iringa ili wafahamu mwelekezo wake unaolenga kukifanya chama hicho kiwe cha wanachama wote.

“Huku nyuma kulikuwepo na baadhi ya wana CCM waliokuwa wakijinasibu kwamba wao ndio wenye chama na wana uwezo wa kuamua lolote bila maamuzi ya vikao vya chama. Kwa muda mrefu wana CCM hao walionekana watu wenye nguvu kuliko chama, nataka kuwaambia CCM ya sasa sio ya wakati ule, tunawasubiri wapiti kwenye reli, tuwashughulikie,” alisema.

Wakati huo huo Chalamila amewakumbusha wana CCM kujiandaa kwa uchaguzi wa mwakani wa Serikali za Mitaa akisema; “ni uchaguzi muhimu unaosaidia kutathimini utekelezaji wa Ilani ya chama kwa kuzingatia vipaumbele vyake na ndio unatoa dira ya maandalizi ya uchaguzi mkuu wa 2020.”

Baada ya kukutana na halmashauri kuu ya CCM ya wilaya ya Mufindi, Chalamila anatarajiwa pia kukutana na na wajumbe wa vikao hivyo wa wilaya ya Kilolo, Iringa Vijijini na Manispaa ya Iringa katika ziara yake anayofanya akiwa na Mjumbe wa Halmashauri Kuu ya Taifa (Viti 15 Bara), Theresia Mtewele

Monday, 4 June 2018

DAKTARI AFAFANUA KILICHOKATISHA UHAI WA MAPACHA WALIOUNGANA

Image result for MAPACHA WALIOUNGANA



DAKTARI bingwa wa magonjwa ya ndani wa hospitali ya rufaa ya mkoa wa Iringa, Dk Faith Kundi amezungumzia sababu zilizosababisha mapacha maarufu walioungana, Maria na Consolata Mwakikuti kupoteza maisha kabla ya kufikia ndoto zao.

Moja ya ndoto waliyokuwa nayo mapacha hao ni kumaliza elimu yao ya chuo kikuu, na kutumia maarifa ambayo wangepata kusaidia jamii, wakiwemo watu wenye ulemavu.

Akizungumza na wanahabari mapema leo, Dk Kundi alisema Maria alikuwa na tatizo zaidi la kiafya ikilinganishwa na Consolota.

“Maria alikuwa na tatizo kubwa kwenye mapafu, mapafu yalikuwa yameharibika hali iliyomfanya asaidiwe na mashine ya Oksijeni kupumua,” alisema.

Alisema aliwapokea pacha hao Mei 17 majira ya saa 1.30 usiku wakitokea katika hospitali ya Taifa ya Muhimbili jijini Dar es Salaam walikokuwa wakitibiwa kwa zaidi ya miezi miwili.

“Wakati nikiwapokea, Maria alikuwa anatumia mashine ya Oksijeni lakini Consolata alikuwa anapumua kawaida na hali hiyo imeendelea hadi mauti yalipowakuta,” alisema.

Pamoja na tatizo la kupumua, Dk Kundi alisema Maria alikuwa na tatizo lingine wakati wa hedhi kwani ilikuwa inabaki ndani kwa ndani na haitoki kama inavyotoka kwa wanawake wengine.

“Pamoja na Maria kutumia Oksijeni muda wote, kwa pamoja walikuwa wanatumia dawa mbalimbali na walikuwa wakifanyiwa vipimo vingine mara kwa mara,” alisema.

Dk Kundi alisema hawezi kusema chochote kama kulikuwepo na uwezekano wa mapacha hao kutengenishwa wakati wa uhai wao na kunusuru maisha yao, kwani suala hilo linahitaji utafiti.

“Hata hivyo lazima nikiri kwamba Mungu amewapa nafasi ya pekee, wameishi miaka 21, sio jambo dogo kwa hali waliyokuwa nayo,” alisema.

Alisema kwa mujibu wa taarifa waliyopewa toka Muhimbili, kwa hali iliyovyokuwa isingewezekana tena kwa Maria kupumua bila mashine ya Oksijeni kwa maisha yake yote yaliyobaki, na ndivyo ilivyokuwa hadi mauti ilipomfika na baadaye kumfika na pacha mwenzake. 

Mapacha hao walikufa Jumamosi iliyopita majira ya saa 2.30 na 3.00 usiku wakati wakiendelea na matibabu, Maria akitangulia na Consolatra akifuata ndani ya dakika 10 na 15 baadaye.

Mapacha hao wa kipekee walikuwa wameungana sehemu ya kiwiliwili, wakiwa na vichwa viwili, mioyo miwili na mikono minne.

Na walikuwa wanatumia viungo vingine kwa pamoja kama tumbo, ini, na sehemu ya uke na haja.

Pamoja na kwamba Maria anaelezwa kuwa na tatizo la kiafya tangu alipozaliwa  alikuwa na uwezo wa kula chakula zaidi ya mwenzake.

Kwa mujibu wa taarifa iliyotolewa jana na Mwakilishi wa Mkuu wa Mkoa wa Iringa ambaye pia ni Mkuu wa Wilaya ya Iringa Richard Kasesela mapacha hao watazikwa Jumatano katika makaburi ya Shirika la Mtakatifu Maria Consolata, Tosamaganaga, nje kidogo ya Manispaa ya Iringa.

Katika wosia wao walioutoa kwa Kiongozi Mkuu wa Shirika la Mtakatifu Maria Consolata, Sista Jane Nugi wakati wakitibiwa katika hospitali ya Taifa ya Muhimbili, waliomba wazikwe katika makaburi ya masista wa shirika hilo katika kijiji cha Tosamaganga kutokana na mchango mkubwa walioutoa masista hao kwao.

Akizungumza na wanahabari jana Sista Jane alisema katika maisha yao yote watoto hao wamelelewa na kupewa huduma zingine muhimu kupitia shirika hilo.

“Watoto hao walikuwa sehemu ya familia ya masista na ndio maana walipewa majina ya ya shirika, Maria na Consolata. Kuondoka kwao kumeacha pengo kubwa sana kwa shirika hili na jamii inayowazunguka,” alisema.

Wakati huo huo baadhi ya ndugu wa mapacha hao ambao awali walidhaniwa kujificha kutokana na hali za mapacha hao wameanza kuwasili mjini Iringa kushiriki mazishi yao.

Pamoja na kaka yao mkubwa Davidi Mwakikuti wengine waliowasili ni mama yao mdogo Anna Mshumbushi, baba mkubwa, wajomba na dada yao Jackline Mwakikuti.

MANENO YA MWISHO YA MAPACHA WALIOUNGANA KABLA HAWAJAKATA ROHO





“DAKTARI tunakufa” yalikuwa ni maneno pekee yaliyotolewa ndani ya dakika 15 na Consolata Mwakikuti baada ya kushuhudia pacha mwenzake Maria Mwakikuti akitangulia kukata roho katika tukio la kusikitisha lililotokea mjini Iringa juzi.

Pacha hao walioungana ambao habari zao zilikuwa gumzo katika vyombo mbalimbali vya habari toka udogo wao hadi sasa, walifariki majira ya saa 2.30 na saa 3.00 usiku wa Jumamosi wakiwa katika hospitali ya rufaa ya mkoa wa Iringa waliokokuwa wakiendelea na matibabu.

Akizungumza na wanahabari jana mganga mfawidhi wa hospitali hiyo, Dk Museleta Nyakirito alisema pacha hao walikuwa na tatizo kwenye njia ya hewa hatua iliyosababisha wafikwe na mauti.

Dk Nyakirito alisema Maria alikuwa wa kwanza kufa na wakati akikata roho, pacha mwenzake Consolata alitoa maneno hayo (Daktari tunakufa) kwa uchungu na baadaye akaa kimya na ndani ya Dakika 10 na 15 baada ya mwenzake kufa naye akafa.

“Juhudi za kunusuru maisha ya pacha hao zilikuwa zikiendelea katika hospitali hii tangu walipofikishwa hapa Mei 17, mwaka huu wakitokea hospitali ya Taifa ya Muhimbili walikokuwa wakipata matibabu,” alisema.

Alisema Januari, mwaka huu mapacha hao walilazwa katika hospitali ya rufaa ya mkoa wa Iringa wakisumbuliwa na magonjwa ya akina mama (hakuyataja) na ndipo walipopewa rufaa ya kwenda Muhimbili  walikokuwa wakitibiwa kwa zaidi ya miezi miwili kabla ya kurejea Iringa.

Alisema walirudishwa Iringa na kufikishwa katika hospitali hiyo majira ya saa 1.30 usiku wakiwa wamesindikizwa na daktari mmoja, muuguzi mmoja, mtaalamu wa wagonjwa mahututi (ICU) pamoja na teknishani wa mambo ya gesi (Oksijeni).

“Kwa taratibu zetu, baada ya kufariki walipelekwa katika chumba cha kuhifadhia maiti ambako miili yao imehifadhiwa hadi sasa wakati taratibu zingine za wanafamilia zikiendelea,” alisema.

Taratibu za mazishi
Akizungumza na wanahabari baadae Kaimu Mkuu wa Mkoa wa Iringa ambaye pia ni Mkuu wa Wilaya ya Iringa Richard Kasesela alisema mazishi yanatarajiwa kufanyika Jumanne au Jumatano katika makaburi ya Kanisa Katoliki, katika kijiji cha Tosamaganga nje kidogo ya manispaa ya Iringa.

“Tunamsubiri Sista Mkuu wa Maria Consolata , Sista Jane ambaye yupo safarini akitokea Dar es Salaam kuja Iringa na atakapofika le oleo tutapanga taratibu za mwisho za mazishi yao” alisema.

Kasesela alisema kabla ya mazishi yao, mapacha hao wataagwa katika viwanja vya Chuo Kikuu cha Ruaha (Rucu) walikokuwa wakisoma shahada ya ualimu.

Aliomba kama kuna ndugu wa mapacha hao popote pale nchini wajitokeze kushiriki mazishi hayo ili kuwapa faraja katika safari yao ya mwisho.

“Hatuna taarifa za ndugu wowote toka tumewafahamu mapacha hao, tunachojua wamekuwa wakilelewa kanisa Katoliki kwa msaada wa wadau mbalimbali kwa maisha yao yote,” alisema.

Wakati huo huo, Kasesela amemshukuru Rais wa Jamuhuri ya Muungano wa Tanzania Dk John Pombe Magufuli kwa rambirambi yake ya Sh Milioni 5 aliyotoa kuomboleza kifo cha mapacha hao.

Nao wanafunzi wa chuo cha RUCu waliokuwa wakisoma na pacha hao wamesema wameupokea msiba huo kwa masikitiko makubwa.

“Baada ya kupokea taarifa hizi, chuo kilikuwa kama kimemwagiwa maji. Hakuna aliyeamini taarifa hizo japokuwa ukweli ndio huo. Mungu azilaze roho zao peponi,” alisema mmoja wao aliyejitambulisha kwa jina la Rose.

Maria na Consolata walizaliwa wilayani Makete mkoani Njombe mwaka 1996.

Walisoma shule ya Msingi Ikonda Makete na kuhitimu na kufaulu mtihani wa darasa la saba mwaka 2010, kisha wakajiunga na shule ya Maria Consolata iliyopo Kilolo mkoani Iringa ambapo walihitimu kidato cha nne mwaka 2014.

Baada ya hapo walijiunga na shule ya Sekondari ya Udzungwa wilani Kilolo walipohitimu kidato cha sita mapema mwaka 2017 na wote kufaulu kwa kupata daraja la pili na hatimaye Septemba 2017 wakajiunga na Chuo Kikuu cha Katoliki cha Ruaha (Rucu) walipokuwa wakisomea fani ya ualimu mpaka mauti inawafika.

Saturday, 2 June 2018

TAGOANE WAANDA TAMASHA KUBWA JIJINI ARUSHA

Image result for Mtandao wa Wasanii wa Injili na Maadili ya Utaifa Tanzania (Tagoane)


Na Mwandishi wetu, Arusha

Mtandao wa Wasanii wa Injili na Maadili ya Utaifa Tanzania (Tagoane) umeandaa tamasha kubwa la ‘Tanzania Mama Niwathamani’ linaloitwa Tamani Festival "Asante Mama" lenye lengo la kumshukuru Mungu kwa ajili ya Mwanamke(Mama), kuonyesha thamani ya mama (Mwanamke) na kurejesha shukrani kwa mama kutokana na umuhimu wake kwenye jamii.

Akizungumza na waandishi wa habari, Rais wa Tagoane Dkt. Godwin Maimu alisema tamasha hilo litakalofanyika June 29-Julai mosi jijini Arusha litawashirikisha watu wengi wakiwamo wanamuziki wa Injili.

Alisema lengo hasa ni kurejesha shukrani kwa ‘mama’ Asante Mama ambapo pamoja na mambo mengine, watu watachangia damu salama kwa ajili ya kuokoa uhai wa mama na mtoto wakati wa kujifungua.

Dkt. Maimu alisema sio hivyo tu, tamasha hilo litatoa fursa kwa wanawake kupima afya bure yakiwemo magonjwa mbalimbali kama saratani, figo,shinikizo la damu na mengine yasiyo ya kuambukiza.Hivyo watakuwepo madaktari wabobezi kwa ajili ya kuangalia afya za mama zetu, ni sisi tunaopaswa kuangalia uhai wao na sio mwingine,” alisema.

“Ni tamasha kubwa la siku tatu, japo kutakuwa na uimbaji na mambo mbalimbali tutakuwa na  Maonyesho ya kazi za ubunifu na ujasiriamali za kina mama kwa kuinua uchumi wao, mafunzo mbalimbali ya ujasiria mbali, maombezi  na fursa za kunyanyuka kiuchumi.   

Alitaja mengine yatakayofanyika kwenye tamasha hilo ni onyesha upendo la uzalendo kwa mama kutoa zawadi maalumu kwa mama (Asante Mama)ikiambatana na ziara maalumu ya kutembelea hifadhi za Taifa Manyara na Tarangire ikiwa ni kuenzi utalii wa ndani kwa vitendo aliongeza Dkt.Godwin Maimu Rais wa Tagoane.

Friday, 1 June 2018

ASAS DAIRIES YAPAISHA UNYWAJI WA MAZIWA, YAGAWA PAKITI 400,000




KAMPENI ya unywaji maziwa iliyofanywa katika shule zote za msingi za manispaa ya Iringa na kampuni ya Maziwa ya Asas Dairies katika kuadhimisha wiki ya unywaji maziwa duniani imeelezwa kuchochea unywaji wa maziwa kwa watu wa rika zote.

Taarifa iliyotolewa  na Afisa Lishe wa Manispaa ya Iringa, Anzaely Msigwa kwenye kilele cha maadhimisho hayo yaliyofanyika kiwilaya katika viwanja vya shule ya msingi Ngome mjini Iringa  mapema leo imesema wanafunzi wameonesha kuyapenda maziwa Asas na kutamani kuyanywa kila siku.

“Jumla ya wanafunzi 30,134 na walimu 812 wa manispaa ya Iringa wamekuwa wakipata nusu lita ya maziwa toka maadhimisho hayo yaanze Mei 22, mwaka huu hadi leo Juni 1,” alisema.

Kwa kuzingatia mahitaji hayo, Msigwa aliomba kamati za shule zikae na wazazi na kujadili umuhimu wa kutoa maziwa kwa wanafunzi wakiwa shuleni.

Aidha aliiomba kampuni ya Asas itoe punguzo la bei ya maziwa hayo sambamba na kusogeza huduma hiyo jirani na shule hizo.

Mmoja wa wakurugenzi wa kampuni hiyo, Ahmed Salim Abri alisema; “kwa kutambua umuhimu wa unywaji maziwa mashuleni, menejimenti iliamua kutenga lita 100,000 sawa na pakiti 400,000 za maziwa kuwahamasisha wanafunzi ikiamini kwa kufanya hivyo itahamasisha jamii nzima.”

"Na hilo ndilo lililotokea kwani awali tulipanga kutoa pakiti 120,000 kwa wanafunzi na walimu wa shule hizo za manispaa ya Iringa lakini ongezeko la mahitaji yake lilitulazimu kuongeza idadi," alisema.

Abri alisema kati ya pakiti hizo zenye thamani ya Sh Milioni 200, pakiti 200,000 ziligaiwa kwa wanafunzi na walimu wa shule za manispaa ya Iringa na 200,000 zilizobaki ziligawanywa katika mikoa ya Dodoma, Mbeya na Arusha ambako maadhimisho hayo yamefanyika kitaifa.

Ili kuongeza hamasa ya unywaji maziwa kwa jamii, alisema wameona kampeni ya unywaji wa maziwa wasiishie kuifanya kwenye wiki ya unywaji wa maziwa pekee na badala yake wataitanua katika wilaya zote za mkoa wa Iringa na nje ya mkoa huo.

Akinukuu taarifa ya Shirika la Afya Duniani Abri alisema kutokana na umuhimu wake mwilini, kila mtu anatakiwa kunywa wastani wa lita 200 za maziwa kwa mwaka lakini kwa bahati mbaya wapo baadhi ya watu ambao hawawezi kunywa hata robo ya maziwa kwa mwaka.

Akizungumzia umuhimu wa maziwa mwilini Mkuu wa Wilaya ya Iringa, Richard Kasesela alisema maziwa ni lishe bora na serikali inatambua na kuwekeza katika lishe ili kufikia uchumi wa kati.

Kasesela alisema nchi haiwezi kufikia hatua hiyo ya kiuchumi kama watu wake watakuwa na matatizo ya akili ambayo chanzo chake ni ukosefu wa lishe bora yakiwemo maziwa ambayo mchango wake kwa mwili na akili ya binadamu unaeleweka.

Alisema takwimu mbalimbali zinaonesha hali ya lishe kwa wanafunzi na watoto walio chini ya miaka mitano katika manispaa ya Iringa sio ya kuridhisha.

Alisema takwimu zinaonesha asilimia 42 ya watoto chini ya miaka mitano wana udumavu huku asilimia 28 ya wanawake wajawazito wakiwa na upungufu wa damu, yote hiyo ikitokana na ukosefu lishe bora yakiwemo maziwa.

Mkuu wa wilaya aliziomba halmashauri za wilaya yake (Manispaa na Iringa Vijijini) kuangalia uwezekano wa kuwahamasisha wafanyabiashara wakiwemo wale wa vileo kufanya pia biashara ya maziwa katika maeneo yao.

"Na maziwa yanayotakiwa kuuzwa ni muhimu yakawa yale yaliyosindikwa ili kuwanusuru watumiaji na magonjwa yanayosababishwa na unywaji wa maziwa yasiosindikwa," alisema.

Katika kuchochea unywaji wa maziwa na kwa kuzingatia umuhimu wake huo, Kasesela aliwataka pia wazazi kubadili mitazamo pale wanapowakarimu wageni kwa kuwapa maziwa badala ya vinywaji walivyovizoea.

“Lakini nizihamasishe pia kamati za harusi na sherehe zingine mbalimbali kuweka maziwa katika sherehe zao kwani bei yake ni ndogo na mchango wake mwilini ni mkubwa kuliko vinywaji vingine vilivyozoeleka,” alisema na kutoa mfano war obo lita ya maziwa ya Asas yaliyosindikwa kuwa ni Sh 500 tu kiasi ambacho ni kidogo ikilinganishwa na bei ya vinywaji vingine

Wednesday, 30 May 2018

KITUO CHA KUUZIA BIDHAA ZA ASILI NA UTAMADUNI CHAZINDULIWA IRINGA VIJIJINI









MRADI wa Kuboresha Maeneo Yaliyohifadhiwa Kusini mwa Tanzania (SPANEST) umetumia zaidi ya Sh Milioni 46 kujenga kituo cha kuuzia bidhaa za asili na utamaduni pembezoni mwa barabara inayolekea Hifadhi ya Taifa ya Ruaha katika kijiji cha Malizanga, Iringa Vijijini.

Kituo hicho kinatarajia kuwanufaisha akina mama wa kimasai zaidi ya 20 wanaounda kikundi cha NAMAYANA ambao awali walikuwa wakiuza bidhaa hizo katika mazingira yasio rafiki na watalii; chini ya ardhi na juu ya meza za miti iliyosimikwa ardhini.

Uzinduzi wa kituo hicho ulifanywa juzi na mwakilishi wa Shirika la Maendeleo la Umoja wa Mataifa (UNDP), Getrude Lyatuu katika hafla iliyohudhuriwa na akinamama hao, wazee wa kimila na viongozi mbalimbali wa halmashauri ya wilaya ya Iringa na Mkoa wa Iringa.

UNDP kwa kushirikiana na Mfuko wa Dunia wa Mzingira (GEF) ndio waliokuwa wafadhili wakuu wa mradi wa SPANEST unaokwenda ukingoni baada ya kutekelezwa katika maeneo yaliyohifadhiwa kusini mwa Tanzania kwa zaidi ya miaka mitano.

Akizindua kituo hicho, Lyatuu ambaye pia ni Mkuu wa Kitengo cha Mazingira wa UNDP alisema; “Ni matumaini yangu kwamba kituo hiki kitakuwa chachu ya mabadiliko ya maisha yenu, hatutarajii kuona hali zenu zinazodi kuwa duni baada ya kituo hiki kuja.”

Lyatuu aliwataka akina mama hao kutumia sehemu ya faida wanayopata katika biashara yao kuboresha huduma na bidhaa wanazotengeneza na kuwapeleka shule vijana wao ili wakajifunze lugha mbalimbali hatua itakayosaidia kurahisisha mawasiliano na watalii kutoka nchi mbalimbali wanaotembelea hifadhi ya Ruaha.

Awali Mratibu wa SPANEST, Godwell Ole Maing’ataki alizungumzia ujenzi wa kituo hicho akisema umejumuisha banda la kuuzia bidhaa hizo pamoja na stoo yake, banda la kupumzikia, vyoo vya kisasa na huduma ya maji ya bomba.

Meing’ataki alisema kabla ya ujenzi huo, mradi uliwawezesha viongozi wa kikundi hicho kufanya ziara ya mafunzo katika mikoa ya Arusha na Manyara walikojifunza namna ya kuziongezea ubora bidhaa za utamaduni, jinsi ya kupokea wageni na kuwahudumia kwa usafi.

Katika risala yao iliyosomwa na Maria Singai, akinamama hao wa NAMAYANA walisema kabla ya kituo hicho walikuwa wakipanga bidhaa zao pembezoni mwa barabara na kuathiriwa na jua kali, vumbi na mvua.

Afisa Utalii wa HIfadhi ya Taifa ya Ruaha, Tulidanga George alisema aliwataka wana Malizanga kutumia fursa ya kituo hicho na ahadi ya serikali ya ujenzi wa barabara ya lami kutoka Iringa mjini hadi katika hifadhi hiyo kujifunza historia na tamaduni zao, lugha mbalimbali na namna kuongoza watalii.

Naye Mwenyekiti wa kijiji hicho, Lulamo Kadaga alitoa ombi kwa wadau kuwasaidia kujenga hoteli katika kituo hicho ili huduma za chakula na malazi zipatikane kwa wageni wanaotaka kupumzika huku akitaka kitangazwe kimataifa hatua itakayowawezesha watalii kukifahamu hata kabla ya kukitembelea.

Friday, 25 May 2018

MWENGE WA UHURU WAKIBARIKI KIWANDA CHA NEW FOREST












KIONGOZI wa Mbio za Mwenge Kitaifa, Charles Kabeho mapema leo ameweka jiwe la msingi katika kiwanda cha kuandaa na kutengeneza nguzo, mali ya kampuni ya New Forest, kitakachokuwa na uwezo wa kuzalisha nguzo 800 kwa mzunguko mmoja na 1,600 kwa mizunguko miwili kwa siku pindi kitakapokamilika mwezi ujao.

Kujengwa kwa kiwanda hicho kumedhihirisha juhudi za wilaya hiyo chini ya mkuu wake wa wilaya, Asiah Abdalla za kutekeleza kwa vitendo mkakati wa mkoa wa Iringa wa ujenzi wa viwanda 100 ifikapo Desemba mwaka huu.
  
Ujenzi wa kiwanda hicho kinachojengwa kwa zaidi ya Sh Bilioni 1.7 katika kijiji cha Lundamatwe wilayani humo ulianza Januari mwaka huu.

Akitoa taarifa ya ujenzi kwa kiongozi huyo, mwakilishi wa kampuni ambaye pia ni Afisa Mahusiano na Maendeleo ya Jamii wa kampuni hiyo, Robert Nyachia alisema kukamilika kwa kiwanda hicho kutaifanya kampuni yao iwe na uwezo wa kuzalisha nguzo 180,000 kwa mwaka na kutoa ajira zaidi ya 100 wakati wote wa uzalishaji.

“Lakini pia kitatoa hamasa ya uhifadhi wa mazingira kupitia kilimo cha miti katika maeneo yaliyo wazi ambayo hayatumiki kwa kilimo na ufugaji na kutoa soko la uhakika la miti yote itakayokidhi vigezo vya ubora toka kwa wananchi,” alisema.

Pamoja na ujenzi wa kiwanda hicho, Nyachia alisema kampuni yao ina miliki kisheria shamba la ekari 5,000 za miti wilayani Kilolo ambazo kati yake ekari 2,400 zimepandwa miti aina ya milingoti ambayo ni malighafi ya kuzalisha nguzo na ekari 2,600 za miti aina ya misindano.

Kwa ufadhili wa serikali ya Finland na Mfuko wa Misitu Tanzania, alisema kampuni hiyo imewawezesha pia wakulima zaidi ya 1,200 kupanda miti zaidi ya 2,400,000 wilayani humo.

Akizungumzia mahusiano ya kampuni na jamii inayozunguka miradi yao, alisema kampuni imetumia zaidi ya Sh Bilioni 2.2 kuchangia shughuli na miradi mbalimbali ya maendeleo ya jamii ya wilaya hiyo.

Alitaja miradi hiyo kuwa ni pamoja na ujenzi wa zahanati tatu, nyumba mbili za waganga, nyumba moja ya mwalimu, wodi ya wajawazito na wagonjwa, vyumba vinne vya madarasa, mabweni ya wasichana na ujenzi wa matundu ya vyoo katika shule mbalimbali za msingi za wilaya hiyo.

Akiipongeza kampuni hiyo, Kiongozi wa mbio za Mwenge wa Uhuru aliwataka wazalishaji wa nguzo hizo nchini kuzalisha kwa wingi ili kufikia mahitaji ya Shirika la Umeme Tanzania (Tanesco).

“Nchi ina malighafi za kutosha ambayo ni miti ya kuwezesha uzalishaji wa nguzo hizo kwa wingi. Serikali haina sababu ya kuagiza nguzo toka nje ya nchi kama viwanda vya ndani vinaweza kukidhi mahitaji ya soko kubwa la Tanesco na masoko mengine,” Kabeho alisema.

Taarifa ya Tanesco iliyotolewa mjini Iringa mwaka jana na Msaidizi wa Mkurugenzi Mtendaji wa Usambazaji wa Huduma kwa Wateja, Joyce Ngayhoma inaonesha Tanesco pekee yake inahitaji nguzo zaidi ya 500,000 kila mwaka, kiasi ambacho soko la ndani limeshindwa kutosheleza.

“Kuna wakati tulilazimika kuagiza nguzo kutoka nje ya nchi kwasababu ya changamoto hiyo; wito wetu kwa wazalishaji wa ndani, waongeze uzalishaji ili kutosheleza mahitaji na wazingatie ubora unaotakiwa na shirika,” alisema.

Alisema shirika limejiwekea lengo la kuunganisha wateja wapya zaidi ya 250,000 kila mwaka na kwa hesabu hiyo mahitaji ni makubwa kwasababu wengine wanahitaji nguzo zaidi ya moja ili wafikiwe na huduma.

“Na ikumbukwe tumeingia awamu ya tatu ya miradi ya REA, lengo la serikali ni kuona ifikapo mwaka 2025 vijiji vyote nchini vinakuwa na umeme,” alisema.